विरार स्थानक परिसरात ‘सॅटीस’ची गरज

विरार, ता. २ (बातमीदार) : शहराच्या पूर्व स्थानक परिसरात सॅटिस प्रकल्पासाठी तातडीने प्रस्ताव तयार करून राज्य सरकारकडे सादर करावा. त्यासाठी निधी उपलब्ध करून हा प्रकल्प लवकरात लवकर प्रत्यक्षात आणावा. तसेच विरार पश्चिम भागातही या प्रकल्पाकरीता अभ्यास करून कार्यवाही सुरू करून शहरातील नागरिकांना दिलासा द्यावा, अशी मागणी वसई-विरार महापालिकेचे माजी सभापती सुदेश चौधरी यांनी आयुक्तांकडे केली आहे.

महापालिका आयुक्त मनोजकुमार सूर्यवंशी यांची चौधरी यांनी शिष्टमंडळासोबत भेट घेतली. या वेळी त्यांनी विरार पूर्व रेल्वे स्थानक परिसरात सॅटीस प्रकल्प राबविण्याबाबत आयुक्तांना निवेदनाद्वारे विनंती केली. विरार पूर्व परिसरात लोकसंख्येची झपाट्याने वाढ होत असून हजारो प्रवासी दररोज रेल्वे स्थानकाचा उपयोग करतात, मात्र रेल्वे स्थानकाबाहेरील वाहतूक व्यवस्था, प्रवाशांची गर्दी, रिक्षा-बस स्टँडची गोंधळलेली स्थिती, पादचाऱ्यांना अडथळे व अपुऱ्या सुविधेमुळे नागरिकांना प्रचंड त्रास सहन करावा लागत आहे. या पार्श्वभूमीवर सॅटीस प्रकल्प राबवणे अत्यंत आवश्यक ठरते, असे मत सुदेश चौधरी यांनी निवेदनातून व्यक्त केले आहे.

स्मार्ट सिटी प्रकल्पाला चालना
काही शहरात यशस्वीपणे सॅटीस प्रकल्प राबवले गेल्यामुळे रेल्वे स्थानक परिसरातील वाहतूक सुरळीत होण्यास मदत झाली आहे. जुनी नगर परिषद इमारत आणि पोलिस ठाण्याची इमारत तोडून जागा मोकळी करणे आवश्यक आहे. स्थानक परिसरात स्मार्ट सिटी आणि क्लीन-स्मार्ट स्टेशन संकल्पनेला चालना मिळू शकेल, असे त्यांनी म्हटले आहे.