ठाणे पालिकेची अनधिकृत बांधकाम कारवाई तीव्र

ठाणे पालिकेची अनधिकृत बांधकांवर कारवाई तीव्र
१३४ नळ जोडण्या खंडित, ७९ बोअरवेल केल्या बंद, १८ पंप जप्त
सकाळ वृत्तसेवा
ठाणे, ता. २ : अनधिकृत बांधकामावरून उच्च न्यायालयाने दिलेल्या आदेशानंतर पालिकेनी कारवाईचा फास आवळला जात आहे. यानुसार आता पालिका क्षेत्रातील अनधिकृत बांधकामांच्या १३४ नळ जोडण्या खंडित केल्या आहेत. तर, ७९ बोअरवेल बंद करण्यात आल्या आणि १८ मोटर पंप जप्त करण्यात आले आहेत. या सर्व नळ जोडण्या अनधिकृतपणे घेतल्या होत्या. त्यासंदर्भात गुन्हे दाखल करण्याची कारवाईही करण्यात येत आहे.
अनधिकृत बांधकामांना पाणीपुरवठा दिला असल्यास त्याची कागदपत्रे तपासण्यात यावीत. तर, बांधकाम अवैध असल्यास नळसंयोजन तात्काळ खंडित करण्यात यावे, त्याचप्रमाणे महापालिकेच्या जलवाहिनीवरुन अवैधरित्या नळसंयोजन घेतल्यास तेही तातडीने खंडीत करावे, असे निर्देश महापालिका आयुक्त सौरभ राव यांनी पाणी पुरवठा विभागास दिले आहेत. त्या अनुषंगाने, २५ जुलैपासून महापालिका क्षेत्रात अनधिकृत बांधकामांची नळ जोडणी खंडित करण्याची विशेष मोहीम घेण्यात आली.

‘या’ ठिकाणी कारवाई
या मोहिमेत दिवा, मुंब्रा, माजिवडा-मानपाडा, कळवा, उथळसर, लोकमान्य नगर-सावरकर नगर या प्रभाग समिती क्षेत्रात पाहणी करून कारवाई करण्यात आल्याची माहिती उपनगर अभियंता (पाणी पुरवठा विभाग) विनोद पवार यांनी दिली. या मोहिमेत अर्धवट बांधकाम असलेल्या तसेच व्याप्त असलेल्या बांधकामांची पाहणी करून तेथील नळ जोडण्या खंडित करण्यात आल्या. पंपही जप्त करण्यात आले असून बोअरवेलही बंद करण्यात आल्या आहेत.

तक्ता
दिनांक नळ जोडणी खंडित बोअरवेल बंद मोटर जप्त
२५ जुलै - ०४ ०७ ००
२६ जुलै - १० ०४ १०
२८ जुलै - २८ १९ ०२
२९ जुलै - ३१ १५ ०२
३० जुलै - ३४ ११ ०१
३१ जुलै - २७ २३ ०३
एकूण - १३४ ७९ १८