म्हसकळ गावात मृत्यनंतरही मरणयातना

म्हसकळ गावात मृत्यनंतरही मरणयातना
७७ वर्षांनंतरही स्मशानभूमीकडे रस्ता नाही

टिटवाळा, ता. २ (वार्ताहर) : तालुक्यातील म्हसकळ गाव आजही मूलभूत सुविधांपासून वंचित आहे. या गावात मृतदेह नेण्यासाठीदेखील रस्ता उपलब्ध नसल्याचे विदारक वास्तव शुक्रवारी समोर आले. एका वृद्धाच्या अंत्यविधीसाठी गावकऱ्यांना चिखल, गोटे आणि माती तुडवत मृतदेह स्मशानभूमीकडे नेण्याची वेळ आली. या घटनेचा व्हिडिओ समाजमाध्यमांवर व्हायरल झाला आहे. यामुळे गावाची ही वाईट अवस्था पुन्हा एकदा चर्चेत आली.

पूर्वी स्मशानभूमीकडे जाण्यासाठी गावदांड रस्त्याचा वापर होत असे; मात्र त्या मार्गावर खासगी मालकीच्या जमिनीवर वॉल कम्पाउंड उभारल्याने हा मार्ग बंद झाला आहे. याच रस्त्यावरून जलजीवन मिशन अंतर्गत जलवाहिनीही टाकण्यात आली होती; मात्र आता त्या मार्गाचा वापर करता येत नसल्याने गावकऱ्यांना तात्पुरत्या, कच्च्या आणि धोकादायक मार्गाने मृतदेह नेण्याची वेळ येते. पावसाळ्यात हा रस्ता चिखलात बुडतो आणि त्यावरून वृद्ध, महिला आणि लहान मुलांना चालणेही अशक्य होते. त्यामुळे केवळ अडथळेच नव्हे, तर मृत व्यक्तीच्या सन्मानाला धक्का पोहोचतो, अशी भावना ग्रामस्थ व्यक्त करीत आहेत.

या प्रश्नाबाबत गावकऱ्यांनी प्रशासनाकडे वारंवार तक्रारी केल्या असून, अतिक्रमणाविरोधात कारवाई करण्याचे आदेश दिले गेले; तरीही प्रत्यक्षात काहीही झालेले नाही. जिथे मृत व्यक्तीलाही सन्मानाने शेवटचा निरोप देता येत नाही, तिथं विकास कशाला हवा, असा संतप्त सवाल गावकरी विचारत आहेत. गावात यामुळे असंतोष वाढला असून, येणाऱ्या जिल्हा परिषद व पंचायत समिती निवडणुकांमध्ये ग्रामस्थ मतपेटीतून आपला संताप व्यक्त करतील, असा इशारा देण्यात येत आहे. ग्रामस्थांनी आता १५ ऑगस्टला ग्रामसभा घेऊन ठिय्या आंदोलन किंवा उपोषणाची तयारी सुरू केली आहे. दरम्यान, तहसीलदार सचिन शेजळ यांनी हा विषय नुकताच आपल्या निदर्शनास आल्याचे सांगून यासंदर्भात सविस्तर माहिती घेऊन योग्य निर्णय लवकरच घेतला जाईल, असे स्पष्ट केले आहे.

ठिय्या आंदोलनाची तयारी
आमदार किसन कथोरे यांना या विषयावर विचारणा केली असता त्यांनी म्हटले, की काही नागरिकांच्या चुकीच्या मानसिकतेमुळे रस्ता तयार होऊ शकत नाही. संबंधित जमिनी शेतकऱ्यांनी फार्महाउससाठी विकल्या आहेत. तसेच शासकीय जागेवरही अतिक्रमण केल्याचे त्यांनी सांगितले. शासनाच्या जनसुविधा योजनेतून दोन वेळा २० लाख रुपयांचा निधी प्राप्त झाला होता; मात्र जागा उपलब्ध न झाल्याने तो परत जावा लागला. मात्र योग्य ती जागा उपलब्ध झाल्यास स्मशानभूमीकडे जाणारा रस्ता तत्काळ पूर्ण करण्यात येईल, असे आश्वासन त्यांनी दिले.