पनवेलमध्ये महसूल सप्ताहाला उत्साही प्रारंभ

पनवेलमध्ये महसूल सप्ताहाला उत्साही प्रारंभ
प्रांताधिकाऱ्यांकडून नागरिकांना योजनांचा लाभ घेण्याचे आवाहन
पनवेल, ता. २ (बातमीदार) ः शासनाच्या विविध योजनांची अंमलबजावणी ही मुख्यतः महसूल विभागाच्या माध्यमातून होते. म्हणूनच महसूल विभाग प्रशासनाचा कणा मानला जातो. या विभागाचे महत्त्व अधोरेखित करीत महसूल दिनानिमित्त पनवेल तालुक्यात महसूल सप्ताहाला दिमाखात सुरुवात झाली.
प्रशासकीय भवन, पनवेल येथे पार पडलेल्या उद्घाटन समारंभात उपविभागीय अधिकारी पवन चांडक यांनी नागरिकांना आवाहन केले, की महसूल सप्ताहात सुरू असलेल्या योजनांचा लाभ घ्यावा. ७ ऑगस्टपर्यंत चालणाऱ्या या सप्ताहात विविध सेवा व योजनांची प्रभावी अंमलबजावणी होणार असून, नागरिकांनी त्यात सहभाग नोंदवावा, असे त्यांनी सांगितले. कार्यक्रमात आमदार विक्रांत पाटील, शिवव्याख्याते प्रशांत देशमुख, सहाय्यक पोलिस आयुक्त भाऊसाहेब ढोले, तहसीलदार विजय पाटील आदी मान्यवर उपस्थित होते. महसूल विभागातील अनेक अधिकारी, कर्मचारी आणि पनवेल परिसरातील नागरिक मोठ्या संख्येने या कार्यक्रमाला उपस्थित होते. या कार्यक्रमात शेतकऱ्यांना सात-बारा उताऱ्यांचे अद्ययावत दस्तऐवज वितरित करण्यात आले. यामध्ये तगाई बोजा कमी केलेले, महिला वारस नोंद केलेले, एकत्र कुटुंब नोंद सुधारित केलेले दस्तऐवज होते. शिवव्याख्याते प्रशांत देशमुख यांनी अधिकारी-कर्मचाऱ्यांना आनंदाने काम करण्याचे महत्त्व पटवून दिले. पवन चांडक यांनी महसूल विभागाशी संबंधित सर्व योजनांची माहिती दिली. महसूल सप्ताहादरम्यान शासनाने निर्देशित केलेल्या कामांची माहितीही त्यांनी दिली. सप्ताहाचे उद्दिष्ट म्हणजे थेट सेवा देणे, योजनांचा लाभ नागरिकांपर्यंत पोहोचवणे आणि प्रशासकीय कामांमध्ये गतिशीलता निर्माण करणे असल्याचे सांगण्यात आले.
..............
चौकट
महसूल सप्ताहातील उपक्रम पुढीलप्रमाणे
३ ऑगस्ट : पाणंद व शिवरस्त्यांची मोजणी करून दुतर्फा झाडे लावण्याचा उपक्रम
४ ऑगस्ट : ‘छत्रपती शिवाजी महाराज महाराजस्व अभियान’ प्रत्येक मंडळात राबविणे
५ ऑगस्ट : डीबीटी योजनेतील लाभार्थ्यांना थेट घरभेट देऊन अनुदान वाटप
६ ऑगस्ट : शासकीय जमिनीवरील अतिक्रमण हटवणे, शर्तभंग प्रकरणांवर निर्णय