प्रलंबित प्रकल्पांविरोधात आंदोलन उभारणार : खासदार म्हात्रे

शहापूर, ता. २ (वार्ताहर) : तालुक्यातील भावली नळपाणी पुरवठा योजना आणि शहापूर-खोपोली महामार्ग यांसारख्या रखडलेल्या प्रकल्पांविरोधात प्रभावी आंदोलन उभे करणार असल्याचे खासदार सुरेश म्हात्रे यांनी शनिवारी (ता. २) शहापूर येथे जाहीर केले.
शहापूर तालुक्यातील टंचाईग्रस्त गावांना मौल्यवान ठरणारी भावली धरणावरील नळपाणी पुरवठा योजना विविध कारणांमुळे ९ वर्षांपासून रखडली आहे. ही योजना लवकरात लवकर पूर्णत्वास यावी, यासाठी म्हात्रे यांनी जलसंपदामंत्री राधाकृष्ण विखे पाटील यांची काही दिवसांपूर्वी भेट घेतली होती. त्यानंतर शनिवारी शहापूर येथे जीवन प्राधिकरण व इतर विभागांच्या अधिकाऱ्यांसोबत कामाचा आढावा घेतला. त्यावेळी प्रसार माध्यमांशी बोलताना, शहापूर तालुक्यातील रखडलेल्या प्रकल्पांना चालना देण्यासाठी आंदोलन उभे करणार असल्याचे ते म्हणाले. रखडलेल्या भावली पाणीपुरवठा योजनेच्या निमित्ताने ते म्हणाले, कामे मंजूर करून टक्केवारी घेऊन बाजूला व्हायचे मी या विरोधात आहे. प्रकल्पांचे श्रेय कुणीही घ्या; परंतु हे प्रकल्प पूर्णत्वास गेले पाहिजेत, असे म्हात्रे यांनी सांगितले.