शहाड येथे सिमेंट काँक्रीटच्या रस्त्याचा प्रश्न मार्गी

शहाडमधील रस्त्याचा प्रश्न मार्गी
कल्याण, ता. ५ (वार्ताहर) : कल्याण पश्चिम विधानसभा मतदारसंघातील शहाड येथे सिमेंट रस्त्याच्या काँक्रीटच्या कामाचे भूमिपूजन रविवारी (ता. ३) शिवसेना शिंदे गटाचे जिल्हाप्रमुख अरविंद मोरे, कल्याण पश्चिमचे आमदार विश्वनाथ भोईर यांच्या उपस्थितीत पार पडले.
कल्याण पश्चिम विधानसभा मतदारसंघाचे आमदार विश्वनाथ भोईर यांच्या मतदारसंघातील प्रत्येक प्रभागातील रस्ते सिमेंट काँक्रीट केले जात आहेत. त्याचाच एक भाग म्हणून शहाड स्थानक रोड येथील अंबर हॉटेल ते गणेश कोट ऑफिसपर्यंत रस्त्याचे काँक्रीटीकरण केले जाणार आहे. स्थानिक माजी नगरसेवक गणेश कोट यांनी यासाठी पाठपुरावा केला आहे. आमदार विश्वनाथ भोईर यांनी सकारात्मक प्रतिसाद देत तातडीने निधी उपलब्ध करून देत रस्त्याच्या सिमेंट काँक्रीटीकरण कामाचे भूमिपूजन केले. त्याबद्दल स्थानिक नागरिकांनी आमदार विश्वनाथ भोईर यांचे आभार मानले. याप्रसंगी शाखाप्रमुख कैलास ढोणे, सुनील भोईर, गावप्रमुख राजेश भंडारी, नितीन कोट, संतोष कशेळकर, युनूस शेख यांच्यासह शिवसेना पदाधिकारी, शिवसैनिक, युवासैनिक तसेच प्रभागातील नागरिक मोठ्या संख्येने उपस्थित होते.