मुंबई कोस्टल रोडचे काम पूर्ण

मुंबई कोस्टल रोडचे काम पूर्ण
अभियंता व कर्मचाऱ्यांची वर्सोवा-भाईंदर प्रकल्पात रवानगी
सकाळ वृत्तसेवा
मुंबई, ता. ५ ः मुंबई कोस्टल रोड प्रकल्पाचे काम अखेर पूर्ण झाले आहे. १०.५ किमी लांब असलेल्या आकर्षक विहाराचे कामदेखील पूर्ण झाले असून, येत्या १५ ऑगस्ट रोजी त्याचे उद्‌घाटन होण्याची शक्यता आहे. त्यामुळे या प्रकल्पात गेल्या सहा वर्षांपासून कार्यरत असलेले ११ अभियंते आणि आठ कार्यालयीन कर्मचाऱ्यांकडे आता विशेष काम उरलेले नाही. त्यामुळे त्यांना महापालिकेने वर्सोवा ते मिरा-भाईंदरदरम्यान नव्याने उभारण्यात येणाऱ्या कोस्टल रोड प्रकल्पात बदली करण्याचा निर्णय पालिकेने घेतला आहे.
पालिका मुख्यालयात झालेल्या बैठकीत हा निर्णय घेण्यात आला आहे. मुंबई कोस्टल रोडचे काम पूर्ण झाल्याने येथील अभियंता, कर्मचाऱ्यांना सध्या काम उरलेले नाही. त्यामुळे या प्रकल्पात अनुभवी असलेल्या अधिकारी-कर्मचाऱ्यांची दुसऱ्या विभागात नेमणूक न करता त्याच प्रकारच्या नवीन प्रकल्पात त्यांचा अनुभव वापरण्यात येणार आहे. सध्याच्या कोस्टल रोडच्या देखभालीसाठी केवळ एक-दोन अभियंते आणि काही कर्मचारी पुरेसे ठरणार आहेत, बाकीच्या कर्मचाऱ्यांकडे कोणतेही काम नसल्याने त्यांना नवीन प्रकल्पात सहभागी करून घेण्यात येणार आहे. महापालिकेने या कर्मचाऱ्यांची वर्सोवा ते मिरा-भाईंदरदरम्यान नव्याने उभारण्यात येणाऱ्या कोस्टल रोड प्रकल्पात बदली करण्याचा निर्णय घेतला आहे.