अंधेरी पूर्वेत शिधापत्रिकेसाठी भव्य शिबिर

अंधेरी पूर्वेत शिधापत्रिकेसाठी भव्य शिबिर
जोगेश्‍वरी, ता. ५ (बातमीदार) ः शिधावाटप कार्यालय २६ ड, अंधेरी पूर्व यांच्या वतीने अंधेरी पूर्व व जोगेश्वरी पूर्व विभागातील पात्र नागरिकांसाठी एकदिवसीय भव्य शिबिर व जनता दरबार आयोजित करण्यात आला आहे. गुरुवारी (ता. ७) एकलव्य आदिवासी सेवा ट्रस्ट, स्वातंत्र्यवीर शाहीर बिरसा मुंडा सांस्कृतिक मंच, साळवेनगर, अंधेरी पूर्व येथे सकाळी ११ ते सायंकाळी पाच वाजेपर्यंत हे शिबिर पार पडणार आहे. या शिबिरात आयुष्मान भारत प्रधानमंत्री जनआरोग्य योजना, महात्मा जोतीराव फुले जनआरोग्य योजनांतर्गत पात्र लाभार्थ्यांना आयुष्मान आरोग्य कार्ड वितरित करणे, शिधापत्रिकेतील सदस्यांचे ई-केवायसी, शिधा न मिळणाऱ्या शिधापत्रिका पुन्हा सुरू करण्यासाठी प्रक्रिया, अन्न सुरक्षा योजनेंतर्गत शिधापत्रिकेतील सदस्यांची इष्टांक पूर्तता व अद्यतन करण्‍यात येणार आहे.