ठाणे तत्कालीन जिल्हाधिकाऱ्यांवर टीकेची राळ

ठाणे तत्कालीन जिल्हाधिकाऱ्यांवर टीकेची राळ
उबाठापाठोपाठ मनसेचाही आरोप
सकाळ वृत्तसेवा
ठाणे, ता. ५ : ठाणे जिल्हाधिकारी यांच्या सेवानिवृत्तीचा सोहळा काशिनाथ घाणेकर नाट्यगृहात पार पडला. यावर जिल्हाधिकाऱ्यांचे निरोप समारंभ राजकीय लोकांनी करणे म्हणजे हा त्यांच्या हितसंबंधांचा भाग म्हणायचं का, असा प्रश्न ठाकरे गटाचे ठाणे जिल्हाप्रमुख केदार दिघे यांनी उपस्थित केला. त्यानंतर आता निवृत्तीआधी शिनगारे यांनी अनेक प्रलंबित प्रस्तावांवर स्वाक्षऱ्या केल्या आहेत. यात राज्यातील वजनदार बिल्डर मंत्री मंगलप्रभात लोढा यांच्या १७ फायलींचाही समावेश असून, याकरिता त्यांनी जिल्हाधिकाऱ्याच्या निवासस्थानी पायधूळ झाडल्याचा आरोप मनसेचे ठाणे-पालघर जिल्हाप्रमुख अविनाश जाधव यांनी पत्रकार परिषदेत केला. तर मुख्यमंत्री देवेंद्र फडणवीस यांनी याची सखोल चौकशी करावी अन्यथा रस्त्यावर उतरून आंदोलन छेडण्याचा इशारा मनसेने दिला आहे.
मिस्टर परफेक्शनिस्ट असा गौरव झालेले तत्कालीन ठाणे जिल्हाधिकारी अशोक शिनगारे यांच्या सही रे सही भानगडीचा भांडाफोड मनसेने केला आहे. अशोक शिनगारे हे तब्बल पावणेतीन वर्षांच्या कारकिर्दीनंतर ३१ जुलै रोजी सेवानिवृत्त झाले. सेवानिवृत्तीच्या आधी २५ ते ३१ जुलै या कालावधीत शिनगारे यांनी अनेक प्रलंबित प्रस्ताव व फायलींवर स्वाक्षऱ्या केल्याचा भांडाफोड मनसेने जिल्हाधिकारी डॉ. श्रीकृष्णनाथ पांचाळ यांना दिलेल्या निवेदनात केला आहे.
सेवानिवृत्तीच्या शेवटच्या दिवशी मंगलप्रभात लोढा यांच्या लोढा ग्रुप आणि मायक्रोटेक कंपनीशी संबंधित १७ प्रस्तावांना शिनगारे यांनी मंजुरी दिली. यामध्ये बांधकाम योजना मंजुरी, शासकीय जमिनीचे हस्तांतरण, वापरासह महत्त्वाच्या विषयांचा समावेश असून यासाठी राजशिष्टाचार डावलून लोढा यांनी चक्क जिल्हाधिकाऱ्यांच्या निवासस्थानी पायधूळ झाडून दबाव टाकल्याचा आरोप मनसेने केला. याची फडणवीसांनी या सर्व फायलींची सखोल चौकशी करावी, अशी मागणी केली आहे.

लोढा यांची उच्चस्तरीय चौकशी व्हावी ः जाधव
लोढा बिल्डरने शासन नियमांचे उल्लंघन करून अपूर्ण शुल्क भरले असून, नियमबाह्य पद्धतीने लाभ मिळवण्याचा प्रयत्न केला आहे. मंगलप्रभात लोढा यांनी शासकीय प्रोटोकॉल डावलून जिल्हाधिकाऱ्यांच्या घरी स्वाक्षऱ्या घेऊन मंत्रिपदाचा गैरवापर केला असेल तर कारवाई व्हायला हवी. २५ जुलै ते ३१ जुलै या कालावधीत मंजूर झालेल्या सर्व प्रस्तावांची संपूर्ण यादी व मूळ कागदपत्रे त्वरित सार्वजनिक करून लोढा यांची उच्चस्तरीय चौकशी करावी, अशी मागणी अविनाश जाधव यांनी केली आहे.

केदार दिघे यांची काय होती पोस्ट?
केदार दिघे यांनी एक्सवर एक पोस्ट केली. अशोक शिनगारे यांच्या सेवापूर्ती कार्यक्रमाच्या काही तास आधी केलेल्या पोस्टमुळे खळबळ उडाली आहे. यामध्ये वसई विरार आयुक्तांचा निरोप समारंभ झाला आणि त्यांच्या संपत्तीचे घबाड ईडीला सापडले. मुळात आयुक्त, जिल्हाधिकारी यांचे निरोप समारंभ राजकीय लोकांनी करणे म्हणजे हा त्यांच्या हितसंबंधांचा भाग म्हणायचं का, जनतेच्या पैशाची उधळपट्टी का, असे प्रश्न त्यांनी उपस्थित केले आहेत.