उत्सवासाठी परवानग्यांचा ससेमिरा

उत्सवासाठी परवानग्यांचा ससेमिरा
प्रशासकीय यंत्रणांमध्ये निरुत्साह, मंडळाचे पदाधिकारी त्रस्त
पनवेल, ता. ५ (बातमीदार)ः सार्वजनिक उत्सवासाठी स्थानिक स्वराज्य संस्थेसह इतरांच्या परवानगीची गरज असते; परंतु पनवेल परिसरातील प्रशासकीय यंत्रणेत निरुत्साह असल्यामुळे विविध मंडळांच्या पदाधिकाऱ्यांची गैरसोय होत आहे.
पनवेल परिसरामध्ये दहीहंडी, गणेशोत्सव आणि नवरात्रोत्सव मोठ्या प्रमाणात साजरे होतात. पनवेल महापालिका क्षेत्रात शेकडो मंडळे रजिस्टर आहेत. या मंडळांना सिडको, महापालिका, अग्निशमन, स्थानिक पोलिस ठाणे, वाहतूक पोलिसांची परवानगी बंधनकारक असते. तर महावितरणकडूनही तात्परत्या स्वरूपात वीजपुरवठा घ्यावा लागतो. महत्त्वाचे म्हणजे सण, उत्सव परंपरा आणि संस्कृती जतन करण्यासाठी राज्य सरकार सकारात्मक आहे. मंडळांना एकदम पाच वर्षे परवानगी देण्यात यावी, अशा प्रकारची भूमिका तत्कालीन मुख्यमंत्री एकनाथ शिंदे यांनी घेतली होती; परंतु पनवेल पालिका क्षेत्रातील सार्वजनिक मंडळांना परवानगी घेताना खरोखर नाकीनऊ येत आहेत. शासकीय कार्यालयांमध्ये एका परवानगीसाठी फेऱ्या माराव्या लागतात. परिणामी, उत्सव सुरू होईपर्यंत शासकीय परवानगी मिळत नसल्याने सण, उत्सव साजरे करावे की नाही, असा प्रश्न अनेकदा मंडळाच्या कार्यकर्त्यांना पडतो. त्यामुळे आगामी उत्सवांच्या पार्श्वभूमीवर सर्व विभागांशी समन्वय साधून मंडळांची गैरसोय होणार नाही, याची दक्षता घ्यावी, अशी विनंती शिवसेना जिल्हाप्रमुखांकडून पालिका आयुक्तांकडे पत्रातून केली आहे.
----------------------------------------
पनवेल परिसरामध्ये सार्वजनिक सण-उत्सव मोठ्या प्रमाणात साजरे केले जातात. यासाठी संबंधित विभागांची परवानगी आवश्यक असते; मात्र त्यासाठी मंडळांची अडवणूक होते. त्याच पार्श्वभूमीवर पालिका आयुक्तांना पत्र दिले आहे. तसेच उपमुख्यमंत्री एकनाथ शिंदे यांनासुद्धा याबाबतचे निवेदन देणार आहे.
- रामदास शेवाळे, पनवेल जिल्हाप्रमुख, शिवसेना