पुरुषांच्या डब्ब्यात चढणे पडले एका महिलेला महागात

पुरुषांच्या डब्यात चढणे पडले एका महिलेला महागात
पाऊण लाखांचा ऐवज असलेली बॅग चोरी
सकाळ वृत्तसेवा
ठाणे, ता. ५ : लहान मुलीला घेऊन ठाणे धीम्या लोकलच्या पुरुषांच्या डब्यात चढणे पनवेलच्या एका महिलेला चांगलेच महागात पडले आहे. या प्रवासात त्यांच्या खांद्याला अडकवलेली बॅग चोरीला गेली असून, त्यामध्ये पाऊण लाखांचे सोने आणि चांदीचे दागिने होते. याप्रकरणी त्यांनी ठाणे लोहमार्ग पोलिस ठाण्यात तक्रार नोंदवली आहे.
पनवेल येथील अश्विनी मंडलिक (वय २८) यांना नाशिकला जायचं होते. त्यासाठी सोमवारी (ता. ४) त्या खांदेश्वर रेल्वे स्थानकातून ठाणे धीम्या लोकलमधील पुरुषांच्या जनरल डब्यात लहान मुलीसोबत गर्दीतून चढल्या. त्या वेळी त्यांनी खांद्याला बॅग अडकवली होती. लोकल ठाणे स्थानकात आल्यावर मुलीला कडेवर घेऊन घाईघाईत त्या फलाटावर उतरल्या. तेव्हा बॅग त्यांना मिळून आली नाही. शोधाशोध केल्यानंतरही बॅग मिळून न आल्याने ती अज्ञात चोरट्याने चोरल्याप्रकरणी अश्विनीने ठाणे लोहमार्ग पोलिस ठाण्यात तक्रार नोंदवली. त्यामध्ये चोरीला गेलेल्या बॅगेत ४७ हजार रुपयांचे सोन्याचे छोटे गंठण, २२ हजारांच्या कानातील रिंगा, दोन हजारांचे चांदीचे पैंजण, दोन हजारांचे बाळाच्या हातातील कडे आणि एक हजार सहाशे रुपयांच्या बाळाच्या कानातील बाळ्या आणि इतर वस्तू असा ७४ हजार ६०० रुपयांचा ऐवज चोरीला गेल्याचे तक्रारीत नमूद करण्यात आले आहे. याप्रकरणी वरिष्ठ पोलिस निरीक्षक अर्चना दुसाने यांच्या मार्गदर्शनाखाली तपास सुरू आहे.