महिलाचालकावर गुन्हा दाखल

अंबरनाथ, ता. ५ (वार्ताहर) : अंबरनाथ पूर्व येथील ग्रीन सिटी संकुलासमोर एका चारचाकी वाहनाने निष्काळजीपणे रिव्हर्स घेतल्याने पादचारी महिलेला जोरदार धडक बसली. या अपघातात महिलेच्या पायाला गंभीर दुखापत होऊन शस्त्रक्रियेची वेळ आली आहे. मात्र, वाहनचालकाने उपचार खर्चास नकार दिल्याने संबंधित वाहनचालकावर शिवाजीनगर पोलिस ठाण्यात गुन्हा दाखल करण्यात आला आहे.
ही घटना रविवारी (ता. ३) दुपारी २.३० वाजता घडली. दीक्षा सुधर्म कांबळे (३५) या ग्रीन सिटी संकुलासमोरून जात होत्या. त्या वेळी एक चारचाकी रिव्हर्स घेताना त्यांना धडक बसली. या धडकेत त्यांच्या पायाच्या घोट्याला मारला. अपघातानंतर वाहनचालक महिला सुरेखा नाडार यांनी जखमींना रुग्णालयात दाखल करून प्राथमिक उपचार खर्च दिला. मात्र, डॉक्टरांच्या तपासणीत पायाच्या हाडाला दोन ठिकाणी क्रॅक असल्याचे निष्पन्न झाले. शस्त्रक्रिया आवश्यक असल्याने कांबळे यांनी पुढील उपचारासाठी नाडार यांना संपर्क साधला. मात्र, त्यांनी मदत नाकारल्याने कांबळे यांनी शिवाजीनगर पोलिस ठाण्यात तक्रार दाखल केली. याप्रकरणी पोलिसांनी गुन्हा दाखल केला आहे. पुढील तपास महिला पोलिस उपनिरीक्षक चित्रा सोनवणे करत आहेत.