डॉ. अनिल राघव यांची नियुक्ती

डॉ. अनिल राघव यांची नियुक्ती

मुंबई, ता. ६ : मुंबई विद्यापीठाच्या भौतिकशास्त्र विभागातील सहयोगी प्राध्यापक डॉ. अनिल राघव यांची आगामी ‘सायंटिफिक कमिटी ऑन सोलर-टेरेस्ट्रियल फिजिक्स’ क्षमता विकास कार्यक्रमाच्या सह-नेतृत्वासाठी नियुक्ती झाली आहे. या प्रतिष्ठित आंतरराष्ट्रीय भूमिकेमुळे मुंबई विद्यापीठाला जागतिक स्तरावर एक महत्त्वाचे स्थान मिळाले आहे.
डॉ. राघव यांची नियुक्ती ही २०२६ ते २०३० या कालावधीसाठी करण्यात आली आहे. ‘सायंटिफिक कमिटी ऑन सोलर-टेरेस्ट्रियल फिजिक्स’ ही संस्था इंटरनॅशनल सायन्स कौन्सिलच्या अंतर्गत कार्यरत असून ती सूर्य आणि पृथ्वी यांच्यातील संबंधांचा अभ्यास करते. अंतराळ हवामानामुळे उपग्रह, दळणवळण प्रणाली आणि ऊर्जा पायाभूत सुविधांवर होणाऱ्या परिणामांचा अंदाज घेण्यासाठी हा अभ्यास अत्यंत महत्त्वाचा ठरतो. यापूर्वीही अनेक भारतीय शास्त्रज्ञांनी या कार्यामध्ये मोलाचे योगदान दिले आहे. मुंबई विद्यापीठाचे कुलगुरू प्रा. रवींद्र कुलकर्णी यांनी डॉ. अनिल राघव यांच्या नियुक्तीबद्दल अभिनंदन करून शुभेच्छा दिल्या.