तुर्भे गावातील तलावात कलश पूजन व जलपूजन मोठ्या उत्साहात संपन्न

तुर्भे गावातील तलावात कलशपूजन व जलपूजन उत्साहात
तुर्भे, ता. ९ (बातमीदार) : भारतीय जनता पक्षाचे माजी नवी मुंबई जिल्हाध्यक्ष डॉ. रामचंद्र घरत आणि माजी नगरसेविका विजया घरत यांच्या माध्यमातून यंदाही जलपूजन व कलशपूजनाचे आयोजन तुर्भे गाव तलाव येथे करण्यात आले होते.
रामचंद्र घरत यांच्या निवासस्थानी युवा नेता गणराज घरत यांनी सपत्नीक कलशपूजन केले. याप्रसंगी रामचंद्र घरत, विजया घरत, भाजप माजी महिला जिल्हाध्यक्षा दुर्गा डोख, तुर्भे ग्रामस्थ, प्रभागातील नागरिक मोठ्या संख्येने उपस्थित होते.
घरत यांच्या निवासस्थानावरून मोठ्या थाटामाटात ढोल-ताशांच्या गजरात डोक्यावर कलश घेऊन महिलांनी संपूर्ण तुर्भे परिसरात मिरवणूक काढून तलावाठिकाणी जलपूजन केले.
श्रावण महिना सुरू असून प्रत्येक ठिकाणी तलाव, नद्या, धरणे भरभरून वाहत आहेत. कलशपूजन करणे ही आपली संस्कृती आहे आणि ती आम्ही जोपासतोय. २०१२ पासून सातत्याने आम्ही या दिवशी कलश व जलपूजन करतो. या तलावाचा इतिहास १०० वर्षे जुना आहे. पाण्याची तहान भागवण्यासाठी लोकांच्या श्रमदानातून या तलावाची निर्मिती झाली होती. या तलावाच्या माध्यमातून कोणत्याही अघटित घटना घडू नये, म्हणून आम्ही इथे पूजन करत असतो. घरापासूनच आमच्या महिला भगिनी अतिशय उत्साहाने नाचत, वाजतगाजत पूजनासाठी येथे येतात, मनोभावे पूजा करतात, याचा मला आनंद आहे, असे रामचंद्र घरत यांनी सांगितले.