मसाज पार्लरमध्ये वेश्या व्यवसाय

कल्याणमधील मसाज पार्लरवर पोलिसांचा छापा
कल्याण, ता. ८ (बातमीदार): बैलबाजार परिसरातील एका उच्चभ्रू इमारतीच्या तळमजल्यावर ‘अवंतरा स्पा’ नावाने मसाज पार्लर चालत होते; मात्र पार्लरच्या नावाखाली देह व्यापार चालत असल्याची माहिती महात्मा फुले पोलिसांना मिळाल्यानंतर पोलिसांनी तातडीने छापा टाकला. पोलिसांनी या छाप्यातून १० तरुणींची सुटका केली असून, दोन आरोपींना अटक करण्यात आली आहे. आरोपींची नावे नौशाद शेख आणि योगेश चव्हाण अशी आहेत. तसेच, मसाज पार्लरच्या मालकाचा शोध पोलिस घेत आहेत.

अनेकदा मसाज सेंटर, स्पा किंवा आयुर्वेदिक मसाज केंद्रांच्या नावाखाली खासगी वेश्याव्यवसायाचा पर्दाफाश होतो. या केंद्रांचे मालक व व्यवस्थापक तरुणींना पैसे देऊन किंवा प्रलोभन दाखवून या व्यवसायाकडे वळवतात. ग्राहकांकडून मोठ्या प्रमाणात पैसे घेऊन त्यातून काही हिस्सा काम करणाऱ्या महिलांना दिला जातो. विशेषतः काही उच्चभ्रू सोसायटींमध्येही अशा स्पा आणि मसाज केंद्रांमध्ये विदेशी तरुणींचा सहभाग असून, तेथे वेश्याव्यवसाय चालत असल्याचे समोर आले आहे.