श्री मलंगगडावर नारळी पौर्णिमेचा उत्साह

श्री मलंगगडावर नारळी पौर्णिमेचा उत्साह
श्री मत्स्येंद्रनाथांना नारळी भाताचा नैवेद्य अर्पण
डोंबिवली, ता. ९ : कल्याणजवळील श्री मलंगगडावर शनिवारी (ता. ९) नारळी पौर्णिमा मोठ्या उत्साहात साजरी करण्यात आली. ठाणे आणि रायगड जिल्ह्यातून आलेल्या हजारो भक्तांनी श्री मलंगगडावर उपस्थित राहून पारंपरिक श्रद्धेने श्री मत्स्येंद्रनाथांना नारळ व नारळी भाताचा नैवेद्य अर्पण केला. सकाळपासूनच जय श्रीरामच्या घोषणांनी गड परिसर दुमदुमून गेला होता. प्रत्येक पौर्णिमेला येथील भक्तगण एकत्र येत असतात; मात्र नारळी पौर्णिमेचे औचित्य साधून यंदा उत्सवाला विशेष रंगत आली.

धार्मिक कार्यक्रमात कोणताही अनुचित प्रकार घडू नये, यासाठी हिललाइन पोलिस ठाण्याच्या वतीने चोख बंदोबस्त ठेवण्यात आला होता. बंदोबस्ताच्या पार्श्वभूमीवर उत्सव शांततेत आणि शिस्तबद्ध पद्धतीने पार पडला. कार्यक्रमास हिंदू मंचाचे सुरेंद्र भालेकर, विश्व हिंदू परिषदेचे धर्मप्रचारक पराग तेली, तसेच भाजप श्री मलंगगड मंडळाचे अध्यक्ष समीर भंडारी, कार्यकर्ते राजेश गायकर, किरण भाग्यवंत, सुनील पाटील आणि अक्षय म्हात्रे यांच्यासह इतर अनेक मान्यवर उपस्थित होते. मलंगगड हे हिंदू-मुस्लिम ऐक्याचे प्रतीक मानले जाणारे ऐतिहासिक व आध्यात्मिक स्थळ असून येथील विविध सणांमध्ये भक्त मोठ्या प्रमाणात सहभागी होतात. यंदाची नारळी पौर्णिमा परंपरा, श्रद्धा आणि सामाजिक सौहार्दाचे उत्तम उदाहरण ठरली.