युरिया खताचा पुरवठा नियमितपणे करणार

युरिया खताचा पुरवठा नियमितपणे करणार
तुटवड्यानंतर कृषी विभागाचे आश्वासन
अलिबाग, ता. ९ (वार्ताहर) ः मागील काही दिवसांमध्ये पेण, अलिबाग, उरण व पनवेल या तालुक्यांमध्ये युरिया खताची टंचाई निर्माण झाली होती. यामुळे शेतकरी चिंताग्रस्त झाले होते, परंतु आता चिंता करण्याची काही गरज नसल्याचे कृषी विभागाने सांगितले आहे. जिल्ह्यात नियमितपणे पुरवठा करण्यात येणार आहे, असे कृषी विभाग आणि आरसीएफ कंपनीच्या प्रतिनिधी यांनी सांगितले आहे. त्यामुळे शेतकऱ्यांनी काळजी करू नये, असे विभागामार्फत सांगण्यात येत आहे.
रायगड जिल्ह्यात खरीप हंगामासाठी म्हणजेच १ एप्रिल ते ३० सप्टेंबर या कालावधीसाठी ११ हजार ९३१ मेट्रिक टन युरिया खताचे आवंटन मंजूर असून, आतापर्यंत एकूण नऊ हजार १५० मेट्रिक टन युरिया व बफर स्टॉकमधील ६९८ मेट्रिक टन असा एकूण नऊ हजार ८४८ मेट्रिक टन युरिया खताचा पुरवठा जिल्ह्यात झाला आहे. त्यापैकी १ ते ७ ऑगस्ट या सात दिवसांच्या कालावधीत ७९० मेट्रिक टन खताचा पुरवठा जिल्ह्यात आरसीएफ कंपनीकडून करण्यात आला आहे, अशी माहिती कृषी विभागाने दिली.

अधिकृत केंद्रातूनच खत खरेदी करावे
शेतकऱ्यांनी फक्त अधिकृत कृषी केंद्रधारकांकडूनच खत खरेदी करावे व सरकारने निश्चित केलेल्या दरानेच खरेदी करावे व घेतलेल्या खताची पावती संबंधित कृषी केंद्रधारकांकडून घ्यावी. काही गैरप्रकार आढळल्यास संबंधित तालुका कृषी अधिकारी आणि जिल्हा अधीक्षक कृषी अधिकारी कार्यालयात संपर्क साधावा व तक्रार नोंदवावी, असे आवाहन जिल्हा अधीक्षक कृषी अधिकारी वंदना शिंदे यांनी केले आहे.

शासकीय कृषी केंद्रधारकांसाठी सूचना
विक्री केंद्रावर सर्व उत्पादने व त्यांची अधिकृत किमती स्पष्टपणे फलकावर दर्शवाव्यात. शेतकऱ्यांना पक्के बिल देणे अनिवार्य आहे. दररोजचा खरेदी-विक्री साठा नोंदवहीत नियमित लिहावा. फक्त अधिकृत कंपन्यांचे, सरकारमान्य उत्पादनेच विक्रीसाठी ठेवावीत. बोगस किंवा कालबाह्य उत्पादने विक्रीस ठेवू नयेत. खताची विक्री ई-पॉस मशीनद्वारेच करावी.