आंतरराष्ट्रीय ड्रग्ज रॅकेटचा पर्दाफाश

आंतरराष्ट्रीय ड्रग्ज रॅकेटचा पर्दाफाश
२६ लाखांचे मेफेड्रोन जप्त
उल्हासनगर, ता. ९ (वार्ताहर) ः उल्हासनगर गुन्हे शाखेने एका आंतरराष्ट्रीय ड्रग्ज रॅकेटचा पर्दाफाश करीत तब्बल २६ लाख रुपयांच्या मेफेड्रोन (एमडी ड्रग्ज)चा साठा जप्त केला आहे. मुंब्रा ते भिवंडीपर्यंत विस्तारित या ड्रग्ज जाळ्यात एका नायजेरियन नागरिकासह पाच आरोपींची टोळी उघडकीस आली आहे.

उल्हासनगर गुन्हे शाखेच्या वरिष्ठ पोलिस निरीक्षक योगेश आव्हाड यांच्या मार्गदर्शनाखाली झालेल्या या कारवाईत १३१ ग्रॅम वजनाचा मेफेड्रोन जप्त करण्यात आला. यामध्ये मुंब्रा येथील नौशिन मैनुद्दीन शेख (वय २६) याला अटक केली आहे. चौकशीतून मिळालेल्या माहितीनुसार, तिचे साथीदार इम्रान खान व हैदरअली शेख यांना मुंब्र्यातून ताब्यात घेण्यात आले. तसेच अधिक चौकशी केली असता भिवंडी परिसरातून नायजेरियन नागरिक चुक्स ओगाबोन्ना आजाह व त्याचा भारतीय साथीदार सिराज शेख यांनाही अटक करण्यात आली. ४ ऑगस्ट रोजी नेवाळी परिसरात हा आरोपी मेफेड्रोन विक्री करणार असल्याची गुप्त माहिती पोलिसांना मिळाली होती. याप्रकरणी हिललाइन पोलिस ठाण्यात गुन्हा नोंदवून सर्व आरोपींना १२ ऑगस्टपर्यंत पोलिस कोठडी सुनावण्यात आली आहे. या कारवाईत सहाय्यक पोलिस निरीक्षक श्रीरंग गोसावी, प्रवीण खोचरे, गणेश गावडे, राजेंद्र थोरवे, योगेश वाघ, रितेश वंजारी, मंगेश जाधव, मीनाक्षी खेडेकर, प्रसाद तोंडलीकर, विक्रम जाधव, कुसुम शिंदे, संजय शेरमाळे व अविनाश पवार यांचाही सहभाग होता.