पट्टा

वृद्धांना आयुष्मान भारत कार्डचे वाटप शिबिर
खारघर, (बातमीदार) : आमदार प्रशांत ठाकूर यांच्या वाढदिवसाचे औचित्य साधून खारघर भाजप खारघर मंडल उपाध्यक्ष किरण पाटील आणि माजी नगरसेविका नेत्रा पाटील यांच्या वतीने मनुस्मृति वृद्धाश्रमामधील वृद्धांना आयुष्मान भारत कार्डचे केले. खारघर येथील मनुस्मृति वृद्धाश्रमात मोठ्या प्रमाणात ज्येष्ठ नागरिक वास्तव्यास आहे. वाढते वय आणि उद्भवणारे आजाराचे विनामूल्य उपचार व्हावे हा उद्देश समोर ठेवून उपक्रम राबविण्यात आला. या वेळी उपस्थित ज्येष्ठांनी व्हिडिओ कॉलद्वारे ठाकूर यांच्याशी संवाद साधला. या वेळी भाजप युवा मोर्चा खारघर मंडल सचिव आदित्य हातगे, वैभव शेजवळ हे उपस्थित होते. दिनेश यादव व नितीन पाटील यांनी आयुष्मान कार्ड तयार करण्यासाठी मेहनत घेतली.
स*स*स*स*स*स*स*स*स*स*
नवी मुंबई लाचलुचपत प्रतिबंधक विभागाकडून भ्रष्टाचाराविरोधात जनजागृती
नवी मुंबई, ता. ९ (वार्ताहर) : लाचलुचपत प्रतिबंधक विभागाच्या नवी मुंबई कार्यालयाच्या वतीने भ्रष्टाचाराविरोधी जनजागृती मोहीम राबविण्यात येत आहे. त्याअंतर्गत मंगळवारी (ता. ५) पनवेल शहर व ग्रामीण पोलिस ठाणे हद्दीत पन्नासहून अधिक गावातील पोलिस पाटील आणि स्थानिक नागरिकांची बैठक घेतली. त्यामध्ये भ्रष्टाचारविरोधी कार्यपद्धतीची माहिती दिली. त्यानंतर बुधवारी (ता. ६) सी.के.टी. कॉलेज, खांदा कॉलनी, नवीन पनवेल येथील कला, वाणिज्य व विज्ञान शाखेतील विद्यार्थ्यांसाठी जनजागृती कार्यक्रम घेण्यात आला.
या दोन्ही कार्यक्रमांना लाचलुचपत प्रतिबंधक विभाग नवी मुंबईचे पोलिस उपअधीक्षक धर्मराज सोनके, पोलिस निरीक्षक किरण वाघ आणि कार्यालयीन कर्मचारी उपस्थित होते. पोलिस उप-अधीक्षक सोनके यांनी उपस्थितांना मार्गदर्शन करताना सांगितले की, कोणत्याही शासकीय कार्यालयातील अधिकारी किंवा कर्मचारी यांच्या वतीने काम करणारा खासगी एजंट कोणत्याही शासकीय कामासाठी लाचेची मागणी करत असेल, तर त्वरित लाचलुचपत प्रतिबंधक विभाग, नवी मुंबई कार्यालयाशी संपर्क साधावा. यासाठी विभागाचे दूरध्वनी व मोबाईल क्रमांक सर्वांना वितरित करण्यात आले. तसेच माहितीपत्रकेही वाटण्यात आली. या मोहिमेद्वारे नागरिक आणि विद्यार्थ्यांमध्ये भ्रष्टाचारविरोधी चळवळीत सक्रिय सहभागाची प्रेरणा देण्यात आली.
स**********
नेरूळमध्ये चोर दहीहंडीचे आयोजन
नेरूळ, ता. ९ (बातमीदार) ः दरवर्षीप्रमाणे यंदाही नवी मुंबई मनसेचे शहर सहसचिव अभिजित देसाई आणि अनुष्का देसाई यांच्यातर्फे रविवारी (ता. १०) सराव चोर दहीहंडीचे आयोजन करण्यात आले आहे. या दहीहंडीला मनसे नेते अमित ठाकरे उपस्थित राहणार आहे, अशी माहिती अभिजित देसाई व अनुष्का देसाई यांनी दिली आहे.
रविवारी संध्याकाळी ६ ते रात्री १० या वेळेत वारणा चौक सेक्टर-२ नेरूळ येथे हा सराव दहीहंडीचा कार्यक्रम पार पडणार आहे. या कार्यक्रमाला मनसेचे माजी आमदार राजू पाटील, मनसे शहराध्यक्ष गजानन काळे व इतर पदाधिकारी उपस्थित राहणार आहेत. या सराव दहीहंडीला शंभरपेक्षा जास्त पथक सलामी देणार आहेत, अशी माहिती अभिजित देसाई यांनी दिली आहे. नवी मुंबईकरांनी सहकुटुंब ही सराव दहीहंडी पाहण्यासाठी उपस्थित राहावे, असे आवाहन अनुष्का देसाई यांनी केली आहे.
ससससससससससससससससससससस