दिवा गावात नारळी पौर्णिमा उत्साहात साजरी

दिवा गावात नारळी पौर्णिमा उत्साहात साजरी
वाशी, ता. ९ (बातमीदार) ः सण आयलाय गो नारळी पुनवचा, अशा पारंपरिक कोळीगीतांच्या तालावर आणि बॅन्जोच्या ठेक्यावर नृत्य सादर करत दिवा कोळीवाड्यातील कोळीबांधवांनी भव्य मिरवणूक काढत नारळी पौर्णिमा मोठ्या उत्साहात साजरी केली.
नवजीवन कलापथक, दिवा कोळीवाडा यांच्या वतीने कार्याध्यक्ष चंदू पाटील यांच्या मार्गदर्शनाखाली आयोजित या सोहळ्याची सुरुवात श्री विठ्ठल-रुक्माई मंदिरात नारळ पूजनाने झाली. पारंपरिक वेशभूषा परिधान केलेल्या युवती, युवक आणि महिला यांनी कोळीगीतांच्या तालावर नृत्य करत गावातून मिरवणूक काढली. या मिरवणुकीत ज्येष्ठ समाजसेवक चंदू पाटील, भाजप पदाधिकारी राजेश मढवी, भाजप युवा पदाधिकारी अ‍ॅड. निकेतन पाटील, मंडळ अध्यक्ष चंदन मढवी, उपाध्यक्ष नामदेव पाटील, सचिव प्रल्हाद नाईक, सूत्रधार यशवंत दिवेकर, युवा उद्योजक नीलेश पाटील यांच्यासह अनेक ग्रामस्थ सहभागी झाले.

जेट्टी अद्ययावत तंत्रज्ञानाने बांधली जाणार ः संजीव नाईक
माजी खासदार संजीव नाईक यांनी उपस्थित राहून नारळ पूजन केले व जेट्टी परिसराची पाहणी केली. कोळीबांधवांशी चर्चा करताना त्यांनी जेट्टीमध्ये कोणते बदल आणि सुधारणा करता येतील, याबाबत सूचना घेतल्या. नाईक म्हणाले, जेट्टीचा परिसर अद्ययावत तंत्रज्ञानाच्या माध्यमातून सुसज्ज करण्यात येणार आहे. यासाठी राज्याचे वनमंत्री व पालघर जिल्ह्याचे पालकमंत्री गणेश नाईक यांच्याशी चर्चा होणार असून, कोळीबांधवांच्या गरजांना प्राधान्य दिले जाईल, असे त्यांनी सांगितले.