लाडक्या बहिणी अडकल्या कोंडीत

लाडक्या बहिणी अडकल्या कोंडीत
कल्याण-शिळ रोडवर वाहनांच्या रांगा
सकाळ वृत्तसेवा
डोंबिवली, ता. ९ : कल्याण-शिळ रोडवर शनिवारी (ता. ९) मोठ्या प्रमाणात वाहतूक कोंडी निर्माण झाली. भावाकडे राखी बांधण्यासाठी निघालेल्या बहिणींसह हजारो प्रवासी या वाहतूक कोंडीत तीन ते चार तास अडकून पडल्या. काही ठिकाणी तर रुग्णवाहिकाही हालचाल करू शकल्या नाहीत, त्यामुळे प्रवाशांचे हाल झाले. शनिवारी रक्षाबंधन आणि सलग सुट्ट्यांचा योग आल्याने नागरिक मोठ्या संख्येने प्रवासासाठी रस्त्यावर पडले; मात्र कल्याण-शिळ मार्गावर सुरू असलेल्या मेट्रो कामामुळे आधीच वाहतूक विस्कळित असते. त्यात रक्षाबंधनाच्या गर्दीमुळे देसाई खाडी ते पलावा जंक्शन, काटई नाका, विको नाका, सोनारपाडा आणि ललित काटा परिसरांमध्ये वाहनांच्या लांबच लांब रांगा लागल्या होत्या.
पलावा जंक्शन येथील कोंडी टाळण्यासाठी नव्याने उभारण्यात आलेल्या पुलामुळे वाहतूक सुरळीत होईल, असा सत्ताधाऱ्यांचा दावा शनिवारी फसला. कोंडी एवढी गंभीर होती की, प्रवाशांना वेळेवर आपल्या गंतव्यस्थळी पोहोचणे अशक्य झाले. कोंडीत वेळ वाया गेल्यामुळे अनेकांनी फिरण्याचे किंवा राखी कार्यक्रमांचे नियोजन रद्द करून घरी परतण्याचा निर्णय घेतला. बसस्थानकांवर मुलाबाळांसह उभ्या असलेल्या महिलांना बस किंवा रिक्षा मिळेचना. काहींनी खासगी वाहनांना थांबवून प्रवासाचा मार्ग शोधण्याचा प्रयत्न केला.

पर्यायी मार्गही ठप्प
कोंडी टाळण्यासाठी काही वाहनचालकांनी काटई नाक्याहून बदलापूर पाइपलाइनमार्गे घारीवली, हेदूटणे या ग्रामीण भागातील पर्यायी मार्ग स्वीकारले, पण ते रस्तेही सकाळपासूनच जाम झाले होते.

आपत्कालीन सेवा ठप्प
या प्रचंड वाहतूक कोंडीचा सर्वाधिक फटका सार्वजनिक वाहतूक आणि रुग्णवाहिकांना बसला. काही रुग्णवाहिका वेळेवर पोहोचू शकल्या नाहीत. त्यामुळे आपत्कालीन सेवा विस्कळित झाल्याचे चित्र होते. कल्याण-डोंबिवलीतील नागरिक, सणवाराच्या दिवशीही वाहतूक नियोजनाची गैरसोय आणि प्रशासनाची उदासीनता यामुळे त्रस्त झाले असून, रस्त्यावरील कामे वेळेत पूर्ण करून वाहतूक सुरळीत करण्याची मागणी जोर धरू लागली आहे.