पर्यावरण संवेदनशील क्षेत्राला रोहेकरांचा विरोध,

पर्यावरण संवेदनशील क्षेत्राला विरोध
आणखी १० गावांतील ग्रामस्थ एकवटले, प्रशासनाला निवेदन देणार
रोहा ता. १० (बातमीदार)ः रोहा तालुक्यातील शेकडो गावे पर्यावरण संवेदनशील क्षेत्रात समावेश केला जाणार आहे. या निर्णयाला चिल्हे, देवकान्हे व खांब भागातील शेतकऱ्यांनी विरोध दर्शवला आहे. असे असताना प्रशासनाकडून मात्र नियोजित गावांतील ग्रामस्थ, शेतकऱ्यांना नोटिसा बजावल्या जात असल्याने आणखी १० गावांतील शेतकऱ्यांनी याविरोधात लढा देण्याचा निर्धार केला आहे.
रोहे तालुक्यातील ११९ गावांचा पर्यावरण संवेदनशील क्षेत्रात समावेश करण्यात आला आहे. पिंगळसई, वांदोली, मढाळी, सोनगाव, गावठाण, धामणसई, मालसई, मूठवली, सांगडे, उडदवणे या गावांमध्ये निर्णयाविरोधात संतापाची भावना आहे. तसेच निर्णयाला विरोध करण्यासाठी हरकती नोंदवण्यासाठी ग्रामस्थ, शेतकरी संघटित झाले आहेत. याच अनुषंगाने शुक्रवारी (ता. ८) सोनगाव येथे एक सभाही घेण्यात आली होती. या सभेला १० गावांतील शेकडोच्या संख्येने ग्रामस्थ उपस्थित होते.
------------------------------
शेतकरी संघर्ष समिती गठित
- धामणसई विभागातील १० गावातील ग्रामस्थ हरकती नोंदविण्यासाठी मंगळवारी रायगडचे खासदार सुनील तटकरे, राज्यसभा खासदार धैर्यशील पाटील, जिल्हाधिकारी रायगड, रोहा प्रांत अधिकारी, वन उपविभागीय अधिकारी, तहसीलदारांना लेखी निवेदन देणार आहेत.
- मालसई, मढाळी, पिंगळसई, धामणसई या चार ग्रामपंचायतीच्या ग्रामसभेत पर्यावरण संवेदनशील क्षेत्राबाबत सर्वानुमते हरकतीचा ठराव मंजूर करण्यात आला. तसेच लढा यशस्वी करण्यासाठी विभागीय शेतकरी संघर्ष समिती गठित करण्यात आली.