लीड स्कूल माणगाव येथे सीबीएसई शिक्षक प्रशिक्षण कार्यशाळा उत्‍साहात

लीड स्कूल माणगाव येथे सीबीएसई शिक्षक प्रशिक्षण कार्यशाळा उत्‍साहात
माणगाव, ता. १० (वार्ताहर) : लीड स्कूल माणगाव येथे नुकतीच दोनदिवसीय सीबीएसई शिक्षक प्रशिक्षण कार्यशाळा यशस्वीरित्या पार पडली. पनवेल येथील शांतिनिकेतन स्कूल, रोहा येथील ग्रेगोरियन स्कूल यांसह विविध सीबीएसई शाळांमधील शिक्षकांनी उत्साहाने सहभाग घेतला. कार्यशाळेचे उद्दिष्ट शिक्षकांना आधुनिक अध्यापन तंत्र, राष्ट्रीय शिक्षण धोरण २०२० अंतर्गत शिक्षणातील नवकल्पना, तसेच विद्यार्थ्यांच्या सर्वांगीण विकासासाठी आवश्यक कौशल्यांचे मार्गदर्शन करणे हे होते.
प्रशिक्षण सत्रांचे मार्गदर्शन जे. एम. राठी स्कूल, रोहा येथील प्राचार्य प्रशांत मुळे आणि ट्री हाउस स्कूल, पेन येथील प्राचार्या अर्चना चव्हाण यांनी केले. त्यांनी अनुभवाधारित शिक्षण, विद्यार्थ्यांशी प्रभावी संवाद आणि अध्यापनातील नवकल्पना या विषयांवर सखोल मार्गदर्शन दिले. लीड स्कूल माणगावचे प्राचार्य बसवराज जगये यांनी सांगितले की, ही कार्यशाळा आमच्या शिक्षकांसाठी अत्यंत उपयुक्त ठरली आहे. अध्यापन अधिक प्रभावी व विद्यार्थ्यांसाठी आकर्षक बनवण्यासाठी नवीन दृष्टिकोन मिळाला आहे. त्यांनी पुढे स्पष्ट केले की, सीबीएसई नियमानुसार शिक्षकांनी दरवर्षी ५० तासांचे व्यावसायिक प्रशिक्षण पूर्ण करणे आवश्यक असून, अशा उपक्रमांमुळे हा उद्देश साध्य होतो. सहभागी शिक्षकांनी विविध उपक्रमांद्वारे डिजिटल साधनांचा वापर, विद्यार्थ्यांच्या मानसिक आरोग्य संवर्धनाच्या पद्धती, तसेच अनुभवाधारित शिक्षणाच्या तंत्रांचा अभ्यास केला. प्रशिक्षणामुळे शिक्षकांचे कौशल्यवर्धन होऊन विद्यार्थ्यांच्या गुणवत्तापूर्ण शिक्षणाला चालना मिळेल, असा विश्वास व्यक्त करण्यात आला.