उसरोलीच्या विकासासाठी आठ कोटींचा निधी

उसरोलीच्या विकासासाठी आठ कोटींचा निधी
आमदार महेंद्र दळवी यांची ग्वाही; आगरी समाजगृह लवकरच उभारणार
मुरूड, ता. १० (बातमीदार) ः उसरोली ग्रामपंचायतीच्या विविध विकासकामांसाठी अल्प कालावधीत तब्बल आठ कोटी रुपयांचा निधी देण्यात आला असल्याची माहिती आमदार महेंद्र दळवी यांनी दिली. शिवसेनेचे मुरूड तालुका संघटक यशवंत पाटील यांच्या विशेष पाठपुराव्यामुळे हा निधी मिळवण्यात यश आले असून, त्यातून अनेक महत्त्वाची कामे पूर्ण झाली आहेत.
मुरूड तालुक्यातील जनतेने दिलेल्या प्रेम आणि मताधिक्याचा उल्लेख करत आमदार दळवी म्हणाले, मुरूड तालुका ज्या मतदारसंघात असेल, तेथूनच मी पुढील विधानसभा निवडणूक लढवणार आहे. उसरोली ग्रामपंचायतीत झालेल्या विविध विकासकामांच्या लोकार्पण सोहळ्यात ते बोलत होते. कार्यक्रमात शिवसेनेचे रायगड जिल्हा उपप्रमुख भरत बेलोसे, जिल्हा संघटिका तृप्ती पाटील, मुरूड तालुकाप्रमुख ऋषिकांत डोंगरीकर, तालुका बांधकाम विभाग अध्यक्ष दिनेश मिणमिने यांच्यासह मान्यवर उपस्थित होते. कार्यक्रमात शिवसेना आणि ग्रामस्थांच्या वतीने आमदार दळवी यांचा नागरी सत्कार करण्यात आला. आपल्या भाषणात आमदार दळवी यांनी येथील आगरी समाजगृह लवकरच बांधण्याचे आश्वासन दिले, तर यशवंत पाटील यांनी आमदारांच्या सहकार्यामुळेच विकासकामे यशस्वीपणे पार पडल्याचे सांगितले आणि आगामी काळात उसरोली ग्रामपंचायतीत शिवसेनेचा सरपंच होण्याची इच्छा व्यक्त केली. या निधीमुळे रस्ते, पाणीपुरवठा, समाजसुविधा आणि अन्य पायाभूत सुविधा उभारणीच्या कामांना गती मिळणार असून, ग्रामस्थांच्या जीवनमानात सकारात्मक बदल घडण्याची अपेक्षा व्यक्त करण्यात आली आहे.