संरचनात्मक परिक्षण महागले

भाईंदर, ता. १० (बातमीदार) : जुन्या व मोडकळीस आलेल्या इमारतींचे संरचनात्मक परीक्षण (स्ट्रक्चरल ऑडिट) मिरा-भाईंदर महापालिकेने नियुक्त केलेल्या पॅनेलवरील बांधकाम अभियंत्यांकडून केले जाते. त्याचे शुल्क संबंधित इमारतीमधील रहिवाशांकडून वसूल केले जाते. या शुल्काच्या दरात महापालिकेने वाढ करण्याचा निर्णय घेतला आहे. नगरविकास विभागाने दिलेल्या निर्देशानुसार आता नव्या तंत्रज्ञानाद्वारे हे परीक्षण केले जाणार असून ते अधिक अचूक होणार आहे.

३० वर्षे जुन्या झालेल्या इमारतींना महापालिकेकडून नोटीस बजावली जाते व इमारतींचे स्ट्रक्चरल ऑडिट करून घेण्यास सांगितले जाते. याशिवाय सकृतदर्शनी धोकादायक वाटणाऱ्या इमारतींनाही महापालिकेकडून नोटीस बजावून ही कार्यवाही करण्यास सांगितले जाते. संरचनात्मक परीक्षणासाठी महापालिकेकडून बांधकाम अभियंत्यांच्या पॅनेलची नियुक्ती करण्यात आली आहे व त्यासाठी इमारतींच्या आकारमानानुसार महापालिकेकडून शुल्क निश्चित करण्यात आले आहे. इमारतीचे परीक्षण करण्यासाठी संबंधित इमारतीच्या रहिवाशांना हे शुल्क महापालिकेकडे जमा करावे लागते. या शुल्कात आता महापालिकेने वाढ केली आहे.

बांधकाम अभियंते इमारतींचे संरचनात्मक परीक्षण करून त्याचा अहवाल महापालिकेकडे सादर करतात. या अहवालावरून संबंधित इमारतीचे महापालिकेकडून सी-१, सी-२ ए, सी-२ बी व सी-३ असे चार गटांत वर्गीकरण केले जाते. सी-१ गटातील इमारती अतिधोकादायक घोषित केल्या जातात व त्या तातडीने रिकाम्या करून पाडण्याची कार्यवाही केली जाते. सी-२ ए या गटातील इमारती रिकाम्या करून त्या दुरुस्त करण्याची मुभा असून दुरुस्तीनंतर रहिवासी पुन्हा त्या इमारतीत राहायला जाऊ शकतात. सी-२ बी या गटातील इमारती रिकाम्या न करता त्यांची दुरुस्ती केली जाऊ शकते. सी-३ या गटातील इमारतींची किरकोळ दुरुस्ती करणे गरजेचे असते.

संरचनात्मक परीक्षणासाठी महापालिकेने २०१९ मध्ये शुल्क निश्चित केले होते; मात्र आता हे संरचनात्मक परीक्षण नव्या तंत्रज्ञानानुसार केले जाणार आहे. यासंदर्भात नगरविकास विभागाने एक चौकट आखून दिली आहे. त्यानुसारच संरचनात्मक परीक्षण करणे बंधनकारक करण्यात आले आहे.

सहा वर्षांनंतर दरामध्ये बदल
नव्या तंत्रज्ञानानुसार स्ट्रक्चरल ऑडिट करण्यासाठी महापालिकेचे सध्याचे दर कमी आहेत, असे पॅनेलवरील बांधकाम अभियंत्यांचे म्हणणे आहे. सहा वर्षांपूर्वी मंजूर केलेल्या दरात नव्या तंत्रज्ञानानुसार स्ट्रक्चरल ऑडिट करणे शक्य होत नसल्याने दर वाढवून देण्याची मागणी अभियंत्यांनी महापालिकेकडे केली. अभियंत्यांच्या मागणीनुसार महापालिकेने स्ट्रक्चरल ऑडिटच्या दरात वाढ केली आहे. या सुधारित दरांना आयुक्त राधाबिनोद शर्मा यांनी नुकतीच मान्यता दिली आहे.

नवीन तंत्रज्ञानातील चाचण्या
नव्या तंत्रज्ञानात आता अल्ट्रासॉनिक पल्स व्हेलॉसिटी टेस्ट, रिबाउंड हॅमर टेस्ट, कोअर टेस्ट, हाफ सेल पोटेन्शियल टेस्ट व कार्बोनेशन डेप्ट टेस्ट कॉलम या महत्त्वाच्या चाचण्या कराव्या लागणार असून त्यासाठी अद्ययावत यंत्रसामग्री वापरावी लागणार आहे. त्यामुळे संरचनात्मक परिक्षण चाचणी अधिक अचूक होणार आहे.

नगरविकास विभागाने दिलेल्या सूचनांनुसार जुन्या इमारतींचे स्ट्रक्चरल ऑडिट नव्या तंत्रज्ञानाद्वारे केले जाणार आहे. त्यासाठी शुल्कात थोडी वाढ करण्यात आली आहे. यासंदर्भात आयुक्त राधाबिनोद शर्मा यांनी पॅनेलवरील बांधकाम अभियंत्यांची बैठक घेऊन संरचनात्मक परीक्षणाचे अहवाल अचूक देण्याबाबत स्पष्ट सूचना दिल्या आहेत.
- दीपक खांबित, शहर अभियंता, मिरा-भाईंदर महापालिका

संरचनात्मक परीक्षणासाठी शुल्क (हजार रुपयांत)
बांधकामाचा प्रकार जुना दर नवीन दर
तळमजली बांधकाम १५ २०
दोन मजली इमारत २१ २५
चार ते सात मजली इमारत ३३ ३५
सात मजल्यांहून अधिक इमारत ५० ६०