स्वातंत्रदिनानिमित्त हर घर तिरंगा, हर घर स्वच्छता मोहीम राबविण्यात येणार..

स्वातंत्रदिनानिमित्त हर घर तिरंगा, हर घर स्वच्छता मोहीम राबविण्यात येणार

पालघर, ता. १० (बातमीदार) ः स्वातंत्र्यदिनाच्या ७९व्या वर्षानिमित्त हर घर तिरंगा, हर घर स्वच्छता ही मोहीम राबविण्यात येणार आहे. पालघर जिल्ह्यातही प्रत्येक ग्रामपंचायतीच्या माध्यमातून १५ ऑगस्टपर्यंत ही मोहीम राबविली जाणार आहे.
हर घर तिरंगा, हर घर स्वच्छता या मोहिमेची संकल्पना लोकसहभागातून उत्सव व नागरी एकतेच्या भावनेवर आधारित आहे. यामध्ये स्वातंत्र्याचा सार स्वच्छता व सुजलता या संकल्पनेशी जोडला आहे. पंतप्रधानांची संकल्पना बळकट करण्यासाठी ग्रामीण भागात, स्वच्छ पाणीपुरवठा, शाश्वत स्वच्छता व आरोग्य सुनिश्चित करण्यासाठी पाणी, स्वच्छता आणि आरोग्य या मोहिमेचे आयोजन करण्यात आले आहे. या मोहिमेचा जिल्हा, तालुका व ग्रामपंचायत स्तरावर स्वच्छ सुजल गाव करण्याची प्रतिज्ञा नागरिक व शालेय विद्यार्थी घेणार आहेत, असे मुख्य कार्यकारी अधिकारी मनोज रानडे यांनी सांगितले.

सार्वजनिक स्वच्छता मोहीम
९ ते ११ ऑगस्ट या कालावधीत सार्वजनिक स्वच्छता मोहीम आयोजित करण्यात आली आहे. यामध्ये सार्वजनिक ठिकाणे, जलकुंभ, पाणी आणि स्वच्छता सुविधांची स्वच्छता करणे. गावातील विद्यार्थी, युवक यांची स्वच्छता रॅली, वैयक्तिक घरगुती स्तरावर रांगोळी काढणे व स्वच्छता घटकांना रंगकाम करणे. नाल्यांची स्वच्छता, सांडपाणी व्यवस्थापन, पाण्याची गळती शोधणे व थांबवणे.

- १२ ऑगस्ट हा पायाभूत सुविधा स्वच्छतादिन म्हणून साजरा करण्यात येणार आहे. यामध्ये जल जीवन मिशनअंतर्गत पायाभूत सुविधांची स्वच्छता व सुशोभीकरणावर विशेष भर देण्यात येणार आहे.
- १३ ऑगस्ट रोजी स्वच्छता संवाद आणि जागरूकता दिन म्हणून साजरा करण्यात येणार असून, कचरा व्यवस्थापन तांत्रिक प्रात्यक्षिक वर्गीकरण, कंपोस्टिंग व शौचालय देखभाल, जलसंवर्धन, भूजल पुनर्भरण, जलस्रोत संरक्षण, एकल वापराचे प्लास्टिक टाळणे इत्यादींबाबत जनजागृती करणे.
- १४ ऑगस्ट रोजी स्वातंत्र्यदिनाची तयारी, यामध्ये गावातील सार्वजनिक ठिकाण, रस्ते, चौक, बाजारपेठा, पाणी, स्वच्छता आणि आरोग्य स्थळांची अंतिम स्वच्छता व सजावट आणि ध्वजारोहणासाठी ठिकाण निश्चित करून साफसफाई करणे.