२१ वर्षांनंतर श्रावणात अंगारकी चतुर्थीचा योग;

टिटवाळा श्री सिद्धिविनायक मंदिरात भाविकांसाठी खास व्यवस्था
२१ वर्षांनंतर श्रावणात अंगारकी चतुर्थीचा योग
टिटवाळा, ता. १० (वार्ताहर) : श्रावण महिन्यातील अंगारकी चतुर्थीचा २१ वर्षांनंतर दुर्मिळ योग मंगळवारी (ता. १२) जुळून येत आहे. यानिमित्ताने टिटवाळा येथील प्रसिद्ध श्री सिद्धिविनायक मंदिरात भाविकांची लाखोंची गर्दी अपेक्षित असल्याने मंदिर ट्रस्टतर्फे व्यापक व सुसज्ज व्यवस्था करण्यात आली आहे, अशी माहिती मंदिराचे विश्वस्त सुभाष जोशी यांनी दिली.
कल्याण तालुक्यातील टिटवाळा हे मध्य रेल्वे मार्गावरील श्रद्धास्थान असून, महाराष्ट्रासह देशभरातून येथे भाविक येतात. साधारणतः दरदिवशी २५ ते ३० हजार भाविक, तर संकष्टी चतुर्थीला सुमारे एक लाख भाविक दर्शन घेतात. अंगारकी चतुर्थीला ही संख्या सव्वा ते दीड लाखांपर्यंत जाते. गर्दीचा पूर्वानुभव लक्षात घेऊन मंदिर परिसरात रांग व्यवस्थापन, पावसापासून बचावासाठी कायमस्वरूपी दर्शन मंडप आणि शिस्तबद्ध प्रवेश मार्गाची सोय करण्यात आली आहे.
वाहतुकीसाठी विशेष नियोजन करण्यात आले असून, मंदिरालगतचे वाहनतळ फक्त रुग्णवाहिका, अग्निशमन, पोलिस आणि अत्यावश्यक सेवांसाठी राखीव ठेवले जाईल. भाविकांनी दूरवरील वाहनतळात अथवा रस्त्याकडेला अडथळा न करता वाहने उभी करण्याचे आवाहन केले आहे.
सुरक्षेसाठी टिटवाळा पोलिस ठाण्याचे ५० पोलिस आणि अनिरुद्ध बापू आपत्कालीन व्यवस्थापन समितीचे तब्बल ३०० स्वयंसेवक तैनात राहणार आहेत. हे स्वयंसेवक भाविकांना रांगेत उभे करणे, पिण्याचे पाणी पुरवणे आणि गरज पडल्यास तातडीने वैद्यकीय मदत पोहोचविण्याचे काम करतील.

दर्शनाची वेळ
मंगळवारी पहाटे चार वाजता अभिषेक व आरतीनंतर मंदिर भाविकांसाठी खुले होईल. दुपारी १२ वाजता आणि चंद्रोदयापूर्वी रात्री ९.१३ वाजता विशेष आरती होईल. रात्री १२ वाजेपर्यंत दर्शनासाठी मंदिर खुले राहील, अशी माहिती सुभाष जोशी यांनी दिली.