अतिधोकादायक इमारती रिकाम्या करण्यासाठी म्हाडा पोलिसांची मदत घेणार

अतिधोकादायक इमारती रिकाम्या करण्यासाठी म्हाडा पोलिसांची मदत घेणार
वीज, पाणी तोडणार; दिलेल्या नोटीसनुसार कारवाई करणार
सकाळ वृत्तसेवा
मुंबई, ता. १० : दक्षिण मुंबईतील मदनपुरा येथील उपकर प्राप्त (सेस) चार मजली अतिधोकादायक इमारत कोसळल्याची घटना नुकतीच घडली आहे. त्यामुळे म्हाडाचे मुंबई इमारत दुरुस्ती व पुनर्रचना मंडळ अलर्ट मोडवर आले असून, पावसाळ्यापूर्वी अतिधोकादायक जाहीर केलेल्या ९६ इमारती तातडीने रिकाम्या केल्या जाणार आहेत.
इमारतींचे वीज, पाणी कापले जाणार आहे. तसेच पोलिसांची मदत घेऊन त्या रिकाम्या करण्याची कारवाई म्हाडाकडून केली जाणार आहे.
म्हाडाने पावसाळ्याच्या पार्श्वभूमीवर म्हाडाने उपकर प्राप्त इमारतींच्या केलेल्या स्ट्रक्चरल ऑडिटमध्ये ९६ इमारती अतिधोकादायक आढळून आल्या आहेत. त्यामध्ये जवळपास दोन हजार ४०० कुटुंबे वास्तव्यास असून, त्यांच्या सुरक्षेच्या अनुषंगाने म्हाडाने त्यांना नोटीस पाठवत इमारती रिकाम्या करण्यासाठी सांगितले होते. तसेच संक्रमण शिबिर किंवा मासिक २० हजार रुपयांच्या भाड्याचा प्रस्ताव त्यांच्या पुढे ठेवला आहे. तरीही रहिवाशांकडून इमारती रिकाम्या करण्यास टाळाटाळ केली जात आहे.
दरम्यान, अतिधोकादायक झालेल्या इमारती कोसळून अपघात झाल्यास मोठी जीवित आणि वित्तहानी होण्याची भीती आहे. तसेच नुकतीच मदनपुरा येथील नूर मंझील ही चार मजली इमारत कोसळून अपघात घडला आहे, मात्र सुदैवाने म्हाडाने सदरची इमारत आधीच सक्तीने रिकामी केलेली असल्याने कोणतीही जीवितहानी झाली नाही. त्यामुळे भविष्यातील धोका ओळखत म्हाडाने जे रहिवासी स्वतः इमारतीखाली करत नाहीत, त्या सक्तीने पोलिसांची मदत घेऊन रिकाम्या केल्या जाणार आहेत. त्याची कार्यवाही आठवडाभरात सुरू केली जाणार आहे.

अपघात झाल्यास अधिकारी जबाबदार कसे?
मुंबईतील सेस इमारतींची जबाबदारी म्हाडाच्या मुंबई इमारत दुरुस्ती व पुनर्रचना मंडळावर आहे. त्यानुसार वेगवेगळ्या प्रकारच्या दुरुस्ती मंडळाकडून केल्या जात असल्या तरी अतिधोकादायक इमारतीची दुरुस्ती करून उपयोग होत नाही. त्यामुळे म्हाडाने त्या रिकाम्या करण्यासाठी आणि संबंधित रहिवाशांना संक्रमण सदनिका किंवा भाडे सुरू करण्यासाठी आवश्यक असलेले पुरावे सादर करण्यास सांगितले आहे. तरीही रहिवासी इमारती रिकाम्या करण्याबाबत कोणताच प्रतिसाद देत नाहीत. त्यामुळे एखादी इमारत कोसळून अपघात झाल्यास म्हाडा किंवा अधिकारी कसे जबाबदार राहतील, असा सवाल एका अधिकाऱ्याने केला.