प्रयोगशाळेच्या उपकरणांसाठी महिलांचा शाळेला मदतीचा हात

प्रयोगशाळेच्या उपकरणांसाठी महिलांचा शाळेला मदतीचा हात
कल्याण, ता. १० (बातमीदार) : इनरव्हील क्लब कल्याण डायमंडसच्या वतीने कल्याण-चिकणघर येथे महिला विशेष कार्यक्रम मोठ्या उत्साहात साजरा करण्यात आला. जवळपास २०० ते २५० मैत्रिणींनी या कार्यक्रमात सहभाग घेत कार्यक्रमाचा आनंद लुटला. बॉलीवूडच्या थीमवर आधारित वेशभूषा करून संगीत, नृत्य, खेळ, खरेदी अशा विविध संकल्पना व स्पर्धा या कार्यक्रमाअंतर्गत आयोजित केल्या होत्या. संपूर्ण कार्यक्रमाचा आनंद लुटल्यानंतर सर्व मैत्रिणींनी एकत्रितपणे स्नेहभोजन केले.
इनरव्हील क्लब आयोजित या कार्यक्रमात सहभागी होण्यासाठी प्रत्येक महिलेकडून ५०० रुपये इतके तिकीटदर आकारण्यात आले होते. आयोजित कार्यक्रमातून तिकिटांच्या माध्यमातून जमा झालेले पैसे हे आम्ही वालधुनी येथील समर्थ विद्यालयातील विज्ञान प्रयोगशाळेत लागणाऱ्या उपकरणांच्या खरेदीसाठी मदतीचा छोटा हात म्हणून देणार असल्याचे या वेळी संस्थेच्या अध्यक्षा तृप्ती बोबडे म्हणाल्या. संस्थेच्या सेक्रेटरी अस्मिता वेखंडे, वृणाली अहिरे, सरला एरंडे, प्रतिभा गटकळ यांनी कार्यक्रम यशस्वी करण्यास महत्त्वाची भूमिका पार पाडली.