पालिकेकडून खड्डे बुजवण्याचे काम वेगाने

नवी मुंबईत पावसाला उसंत
पालिकेकडून खड्डे बुजवण्याचे काम वेगाने
वाशी, ता. ११ (बातमीदार)
नवी मुंबईमध्ये मे महिन्याच्या अखेरीपासूनच पावसाने हजेरी लावली होती, तर आॅगस्ट महिन्यामध्ये सतत कोसळणाऱ्या पावसाला उसंत मिळाल्याने नवी मुंबई महानगरपालिकेने रस्त्यांवरील खड्डे बुजवण्याची कामे वेगाने हाती घेतली आहेत. त्यामुळे दिघा, ऐरोली, वाशी, नेरूळ, कोपरखैरणे, घणसोली, बेलापूर विभागांमध्ये रस्त्यांची दुरुस्ती युद्धपातळीवर सुरू आहे, तर येत्या १० दिवसांवर गणेशोत्सव असल्यामुळे खड्डे बुजवण्याच्या कामालादेखील वेग आला आहे.
नवी मुंबईत पावसाळ्याच्या सुरुवातीपासून मुसळधार पावसामुळे शहरातील मुख्य मार्ग असणाऱ्या ठाणे-बेलापूर मार्गासह सायन-पनवेल महामार्गअंतर्गत रस्ते व चौकांत अनेक ठिकाणी खड्डे पडले होते. यामुळे वाहनचालक, दुचाकीस्वार आणि पादचाऱ्यांना मोठ्या अडचणींना सामोरे जावे लागत होते. अनेक ठिकाणी किरकोळ अपघातांच्या घटनादेखील घडल्या होत्या. पावसाळ्यामये पालिकेकडून तात्पुरती रस्त्यांना मलमपट्टी केली जात होती, पण आता पावसाने उसंत घेतल्यामुळे खड्डे बुजवण्याच्या कामाला वेग आला असल्याचे दिसत आहे. पावसाने विश्रांती घेतल्याने पालिकेच्या स्थापत्य विभागाकडून गरम डांबर व पेव्हर ब्लॉक यांच्या सहकार्यायाने खड्डे भरण्याचे काम गतिमान केले आहे. नागरिकांच्या तक्रारींनुसार प्राधान्याने जास्त वाहतूक असलेल्या रस्त्यांची दुरुस्ती केली जात आहे. यासंदर्भात स्थापत्य विभागाचे अभियंता यांनी सांगितले की, पावसामुळे खड्डे बुजवण्याच्या कामांना अडथळा येत होता. आता वातावरण अनुकूल झाल्याने जास्तीत जास्त ठिकाणी खड्डे बुजवण्याचे उद्दिष्ट ठेवले आहे. नागरिकांनी मात्र या दुरुस्ती कामांमध्ये टिकाऊपणा आणावा, अशी मागणी केली आहे.