कल्याण पूर्वेत ठाकरे गटाचा जनआक्रोश आंदोलन

कल्याण पूर्वेत ठाकरे गटाचे ‘जनआक्रोश आंदोलन’
निवडणूक आयोगाविरोधात जोरदार घोषणाबाजी
कल्याण, ता. १२ (बातमीदार) : राज्यातील महायुती सरकारच्या अपयशावर आणि निवडणूक आयोगाच्या भूमिकेवर टीका करत शिवसेना ठाकरे गटातर्फे कल्याण पूर्वेत ‘जनआक्रोश आंदोलन’ करण्यात आले. कोळसेवाडी येथील मध्यवर्ती शाखेच्या नेतृत्वाखाली झालेल्या या आंदोलनात पदाधिकाऱ्यांनी रस्त्यावर पत्ते खेळत सरकारचा निषेध केला, तर निवडणूक आयोगाविरोधात घोषणांनी परिसर दणाणून गेला. राज्यातील भ्रष्टाचार, महागाई, शिक्षण व पाणीटंचाईसारख्या प्रश्नांवर जनतेत जागृती घडवून आणण्याच्या उद्देशाने ठाकरे गटाने राज्यभर हे आंदोलन उभारले आहे. कल्याण पूर्वेतील आंदोलनात स्थानिक नागरिक, शिवसैनिक आणि पदाधिकारी मोठ्या संख्येने सहभागी झाले होते.

आंदोलनादरम्यान “भ्रष्ट सरकारचा निषेध असो”, “निवडणूक आयोग चोर आहे”, अशी घोषणाबाजी करण्यात आली. शहरप्रमुख शरद पाटील यांनी भाषणात तीव्र नाराजी व्यक्त करत सांगितले की, “निवडणूक आयोग सत्ताधाऱ्यांच्या दबावाखाली काम करत आहे, हे राहुल गांधींनी उघड केले आहे. आयोगाने मतांची पारदर्शक माहिती जाहीर केली पाहिजे. जोपर्यंत मागणी पूर्ण होत नाही, तोपर्यंत शांत बसणार नाही. माजी महापौर रमेश जाधव यांनी सरकारवर निशाणा साधताना म्हटले की, “हे सरकार जनतेच्या विश्वासाला तडा देऊन सत्तेवर आले आहे. भ्रष्टाचार, गद्दारी आणि अंधश्रद्धेला खतपाणी घालणाऱ्या या सरकारला सत्ता टिकवण्याचा अधिकार नाही. आम्ही रस्त्यावर उतरून जनतेच्या हक्कासाठी अधिक तीव्र लढा देऊ.

आंदोलनात ठाकरे गटाचे अनेक पदाधिकारी सहभागी झाले होते. त्यामध्ये सहसंपर्कप्रमुख रमेश जाधव, जिल्हा महिला संघटिका अंजली राऊत, विधानसभा संघटक नारायण पाटील, शहर संघटक मीना माळवे, युवा सेना शहर अधिकारी अ‍ॅड. नीरज कुमार, शहरप्रमुख शरद पाटील हे सर्व प्रमुख नेतृत्व आंदोलनात आघाडीवर होते.