मुलाला दागिने चोरीस प्रवृत्त केल्याप्रकणी तरुणीला अटक

मुलाला दागिने चोरीस प्रवृत्त केल्याप्रकणी तरुणीला अटक
अंधेरी, ता. १२ (बातमीदार) ः १४ वर्षांच्या अल्पवयीन मुलाला त्याच्या राहत्या घरातून सोन्याचे दागिने चोरी करण्यास प्रवृत्त करून सोन्याच्या दागिन्यांचा अपहार केल्याप्रकरणी एका २२ वर्षीय तरुणीला कुरार काल पोलिसांनी अटक केली. लक्ष्मी रामदास विश्वकर्मा, असे या आरोपी तरुणीचे नाव असून, याच गुन्ह्यात ती सध्या पोलिस कोठडीत आहे.
गेल्या दोन महिन्यांत तिने अल्पवयीन मुलाकडून सुमारे सव्वापाच लाख रुपयांचे दागिने घेतले असून, त्या मोबदल्यात त्याला तीन हजार रुपये दिल्याचे पोलिस तपासात उघडकीस आले आहे. तिच्याकडून लवकरच सर्व सोन्याचे दागिने हस्तगत केले जाणार असल्याचे पोलिसांनी सांगितले. ३९ वर्षांचे तक्रारदार कांदीवलीतील कुरार गाव परिसरात राहात असून, इलेक्ट्रिशियन म्हणून काम करतात. त्यांच्या घरी एक इलेक्ट्रिक बोर्ड असून, त्यात त्यांनी काही वस्तू ठेवण्यासाठी जागा बनविली होती. या जागेत त्यांनी त्यांचे घरातील सोन्याचे दागिने ठेवले होते. शुक्रवारी १ ऑगस्टला त्यांना तो बोर्ड उचकलेला दिसला. त्यांनी आतील दागिन्यांची पाहणी केली असता तिथे सुमारे सव्वापाच पाच रुपयांचे विविध सोन्याचे दागिने नव्हते. याबाबत त्यांनी त्यांच्या पत्नीसह १४ वर्षांच्या मुलाकडे विचारणा केली होती, मात्र पत्‍नीला दागिन्यांविषयी काहीच माहिती नव्हती, तर मुलगा दागिन्यांचा विषय निघताच घाबरलेला दिसून आला. पोलिसांना तक्रार करणार असल्‍याचे समजल्‍यानंतर त्याने बोर्डमध्ये ठेवलेले सोन्याचे दागिने घेतल्याचे तसेच ते दागिने लक्ष्मी विश्वकर्माला दिल्याचे सांगितले. पैशांच्या प्रलोभनाला बळी पडून त्याने २१ जुलै ते १ ऑगस्ट २०२५ या कालावधीत घरातील सुमारे सव्वापाच लाख रुपयांचे विविध सोन्याचे दागिने काढून लक्ष्मीला दिले होते. अशा प्रकारे लक्ष्मीने तक्रारदाराच्या मुलाला त्याच्याच घरी चोरी करण्यास प्रवृत्त करून त्याच्याकडून घेतलेल्या सोन्याचा दागिन्यांचा अपहार केला होता. हा प्रकार उघडकीस येताच त्यांनी कुरार पोलिसांना घडलेला प्रकार सांगून लक्ष्मी विश्वकर्मा हिच्याविरुद्ध तक्रार केली होती. अटकेनंतर तिला बोरिवलीतील स्‍थानिक न्यायालयाने पोलिस कोठडी सुनावली आहे.