महापालिकेच्या पदभरतीला अखेर मुहूर्त!

भाईंदर, ता. १२ (बातमीदार) : गेल्या दोन वर्षांपासून रखडलेल्या मिरा-भाईंदर महापालिकेच्या पदभरतीला अखेर मुहूर्त मिळाला आहे. पुढील आठवड्यात ३४० पदांची भरती करण्यासंदर्भातील जाहिरात महापालिकेकडून प्रसिद्ध केली जाणार आहे. टाटा कन्सल्टन्सी सर्व्हिसेसच्या माधमातून ही भरती प्रक्रिया पार पडणार आहे.

राज्य सरकारने मंजूर केलेल्या आकृतीबंधानुसार महापालिकेच्या आस्थापनेवर सुमारे दोन हजार ५६४ पदे आहेत. त्यापैकी एक हजार ७८ पदे रिक्त आहेत. अनेक महत्त्वाची पदे रिक्त असल्याने महापालिकेकडून हाती घेण्यात आलेल्या विकासकामांवर, तसेच दैनंदिन कामकाजावर परिणाम होतो. दोन वर्षांपूर्वी राज्य सरकारकडून राज्यातील सर्वच महापालिकांना रिक्त पदे भरण्याच्या सूचना केल्या. त्यामुळे महापालिकेने रिक्त पदांपैकी अत्यावश्यक असलेल्या ३४० पदांची भरती करण्याचा प्रस्ताव राज्य सरकारकडे मान्यतेसाठी पाठवला. या प्रस्तावाला सरकारने फेब्रुवारी २०२३ मध्ये मान्यता दिली, मात्र दोन वर्षांपासून पदभरतीची प्रक्रिया रखडली आहे. आता प्रशासनाने पदभरतीची प्रक्रिया सुरू करण्याचा निर्णय घेतला असून, पुढील आठवड्यात पदभरतीची जाहीर सूचना प्रसिद्ध केली जाणार आहे.

पहिल्या टप्प्यात २६ संवर्गातील ३४० पदे भरली जाणार आहेत. त्यात प्रामुख्याने कनिष्ठ अभियंता, लिपिक, सर्व्हेअर, स्वच्छता निरीक्षक, चालक, उद्यान अधीक्षक, अग्निशामक, बालवाडी शिक्षिका, प्रसविका, प्लंबर आदींचा समावेश आहे. महापालिकेकडून पदभरतीची जाहिरात पुढील आठवड्यात दिली जाणार आहे. त्यानंतर टीसीएसकडून पुढची कार्यवाही केली जाणार आहे, अशी माहिती उपायुक्त कल्पिता पिंपळे यांनी दिली.

कामांचा दर्जा वाढवण्यासाठी कनिष्ठ अभियंते
महापालिकेच्या सार्वजनिक बांधकाम विभागाकडून अनेक विकासकामे हाती घेतली जातात. त्यावर देखरेख ठेवण्याचे काम कनिष्ठ अभियंत्यांकडून केले जाते. महापालिकेकडे पुरेसे कनिष्ठ अभियंता नसल्याने ते कंत्राटी पद्धतीने घेतले जातात, मात्र यामुळे विकासकामांच्या गुणवत्तेवर प्रश्नचिन्ह उपस्थित होते. त्यामुळे या भरतीद्वारे २७ कनिष्ठ अभियंते सेवेत घेण्यात येणार आहेत. पालिकेच्या अग्निशमन दलाचीदेखील हीच अवस्था आहे.

अग्निशमन विभागाचा ताण कमी होणार
शहर वेगाने वाढत असल्यामुळे अग्निशमन यंत्रणेवरचा ताणही वाढत चालला आहे, मात्र पुरेसे मनुष्यबळ नसल्याने महापालिकेने अग्निशमन विभागात कंत्राटी कर्मचारी घेतले आहेत. पदभरतीद्वारे आता २२८ अग्निशामक, तीन सहाय्यक अग्निशमन केंद्र अधिकारी घेण्यात येणार आहेत.

महापालिकेतील एकूण पदे २,५६४
रिक्त पदे १,०७८
आता पदांची भरती ३४०