विविध समस्यांबाबत आयुक्तांची भेट

स्मारकांच्या रक्षणाबाबत आयुक्तांना निवेदन
बहुजन समाज पार्टीच्या शिष्टमंडळाकडून आयुक्त अभिनव गोयल यांची भेट
कल्याण, ता. १२ (वार्ताहर) : बहुजन समाज पार्टीच्या (बसपा) शिष्टमंडळाने कल्याण-डोंबिवली महापालिका आयुक्त अभिनव गोयल यांची भेट घेऊन दलित वस्त्यांमधील मूलभूत समस्या आणि शक्तीस्थळांचे संरक्षण, तसेच विविध मागण्यांबाबत निवेदन दिले. या वेळी बसपाच्या राज्य आणि शहरस्तरीय पदाधिकाऱ्यांची उपस्थिती होती.

डॉ. बाबासाहेब आंबेडकर यांचा पूर्णाकृती पुतळा कल्याण पूर्व ‘ड’ प्रभागातील पुतळा पुनालिंक रोड दिशेने पुनर्स्थापित करावा. निकृष्ट बांधकाम करणाऱ्या ठेकेदाराचे बिल थांबवावे आणि कामाची तपासणी करून कारवाई करावी. १९६२ मध्ये स्थापन झालेल्या डॉ. बाबासाहेब आंबेडकर उद्यानाचे विस्तारीकरण व सुशोभीकरण आणि त्या ठिकाणी ऐतिहासिक घटनेचे स्मारक उभारण्याची शिफारस शासनाकडे पाठवावी. महापालिकेच्या दलित वस्त्यांमध्ये पाणी, ड्रेनेज, रस्ते, आरोग्य आदी मूलभूत सोयी-सुविधा तातडीने पूर्ण कराव्यात. तसेच आगामी सार्वत्रिक निवडणुकीच्या पार्श्वभूमीवर एससी/ एसटी समाजाच्या लोकसंख्येचा विचार करून प्रभाग रचनेत वाढ करण्याची मागणी केली. तसेच शास्त्रीनगर व रूक्मिणीबाई रुग्णालये पुन्हा सुरू करून तिथे आवश्यक आरोग्य सुविधा पुरवाव्यात. एससी/एसटी अधिकारी-कर्मचाऱ्यांचे मानसिक शोषण केल्याचा आरोप करत त्यावर निष्पक्ष चौकशी व संविधानिक संरक्षणाची मागणी केली.

नगररचना विभागात एकाच ठिकाणी वर्षानुवर्षे कार्यरत कर्मचाऱ्यांच्या तत्काळ बदल्यांचे निर्देश द्यावेत. अशोकनगर (पूर्व) येथील बुद्धभूमी फाउंडेशनची जागा संरक्षित ठेवून, रस्ता रुंदीकरणामुळे बाधित झालेल्या जागेचा योग्य मोबदला संस्थेस द्यावा. कल्याण पश्चिम – आरटीओ ते बीके नगर रस्त्याच्या सीमांकनात सत्ताधारी नेत्याच्या बंगल्यास वाचवण्यासाठी मागासवर्गीयांची घरे पाडली गेली, असा गंभीर आरोप करत सीमांकन पुन्हा करावे, अशी मागणीही करण्यात आली. या शिष्टमंडळात बसपाचे प्रदेश सचिव व ठाणे जिल्हा प्रभारी सुदाम गंगावणे, कल्याण शहर उपाध्यक्ष विजय सोनवणे, सचिव बाळू भोसले, कल्याण पश्चिम विधानसभा अध्यक्ष प्रदीप सोनावणे, पूर्व विधानसभा अध्यक्ष गौतम कांबळे, शहराध्यक्ष सिद्धार्थ सोनवणे, विधानसभा सचिव मंगेश ओव्हळ, मोहने शहर अध्यक्ष श्रीकांत साळवे आदी पदाधिकारी उपस्थित होते.