डोंबिवली स्थानकात प्रवासी घामाघूम

डोंबिवली स्थानकात प्रवासी घामाघूम
चार वर्षांपासून पंखे, इंडिकेटर गायब; प्रवाशांमध्ये तीव्र नाराजी
सकाळ वृत्तसेवा
डोंबिवली, ता. १२ : मध्य रेल्वे मार्गावरील डोंबिवली हे सर्वाधीक वर्दळीचे रेल्वेस्थानक असून, दिवसेंदिवस प्रवाशांच्या गैरसोयींमुळे चर्चेचा विषय बनत आहे. विशेषतः फलाट क्रमांक चारच्या कल्याण दिशेच्या विस्तारित भागात गेली चार वर्षांपासून येथे पंखे आणि डिजिटल इंडिकेटरचा अभाव आहे. त्यामुळे येथे प्रवास करणारे प्रवासी अक्षरशः घामाघूम होत आहेत.

मध्य रेल्वेने काही वर्षांपूर्वी १२ आणि १५ डब्यांच्या लोकल ट्रेनसाठी फलाट विस्तार केला. डोंबिवली स्थानकातील सर्व फलाटांचे विस्तारीकरण करण्यात आले. फलाट क्रमांक चारच्या कल्याणकडील टोकावरील विस्तारित भागावर नियमितपणे लोकल थांबत असल्या तरी, तिथे न पंख्यांची व्यवस्था आहे ना सूचनाफलक (इंडिकेटर) आहे. तुलनेत फलाटाच्या मुंबई बाजूला मात्र दोन्ही सुविधा उपलब्ध आहेत. त्यामुळे केवळ अर्ध्या फलाटावर सुविधा असणे हे प्रवाशांच्या दृष्टीने अन्यायकारक व अर्धवट कामगिरीचे लक्षण मानले जात आहे.

पावसाच्या दिवसांतही लोकलमध्ये चढण्यासाठी धावणाऱ्या प्रवाशांना या विस्तारित फलाटावर उभे राहणे अत्यंत कष्टप्रद ठरत आहे. उकाड्यामुळे घामाने ओथंबलेले प्रवासी वेळोवेळी रेल्वे प्रशासनाकडे तक्रारी नोंदवत असले तरी त्याकडे दुर्लक्ष केले जात आहे, अशी भावना प्रवासी संघटनांनी व्यक्त केली आहे. रेल्वे प्रवासी संघटनांनी यापूर्वी फलाट क्रमांक पाचवरील अशाच समस्यांसाठी आंदोलन करून सुविधा मिळवून दिल्या होत्या. आता फलाट क्रमांक चारवरील विस्तारित भागासाठीही तोच दबाव आणण्याची गरज आहे, असे मत प्रवाशांकडून व्यक्त केले जात आहे.

प्रशासनाचा पुढाकार हवा
फलाटांचे विस्तारीकरण जलद गतीने पूर्ण करणाऱ्या रेल्वे प्रशासनाने सुविधा देताना मात्र हलगर्जी का केला, असा सवाल आता उपस्थित होतो. प्रवाशांनी मागणी केली आहे की, तत्काळ पंखे आणि डिजिटल इंडिकेटर लावून प्रवाशांची गैरसोय दूर करावी. रेल्वे प्रशासनाने याप्रकरणी त्वरित पावले उचलून प्रवाशांचा विश्वास पुनर्स्थापित करावा, अशी अपेक्षा आहे. अन्यथा पुन्हा एकदा प्रवासी संघटनांकडून आंदोलनाचा पवित्रा घेतला जाईल, अशी शक्यता नाकारता येत नाही.