मानाच्या हंडीसाठी थरावर थर

मानाच्या हंडीसाठी थरावर थर
ठाणे शहरात उत्सवाची धामधूम; गोविंदा पथकांना प्रत्येकी दीड लाखाचे बक्षीस
सकाळ वृत्तसेवा
ठाणे, ता. १२ : धर्मवीर आनंद दिघे यांच्या संकल्पनेतून सुरू झालेला ठाण्याचा टेंभी नाका दहीहंडी उत्सव यंदाही प्रचंड उत्साहात साजरा होणार आहे. साहस, रंगत, संगीत, सेलिब्रिटींचा जल्लोष आणि भगव्याचा अभिमानाने फडकणारा माहोल पुन्हा एकदा ठाणेकरांना अनुभवायला मिळणार आहे. राज्याचे उपमुख्यमंत्री एकनाथ शिंदे यांच्या मार्गदर्शनाखाली हा दिमाखदार सोहळा पार पडणार आहे. मुंबईचा जल्लोष आणि उत्साह ठाण्यात आणण्यासाठी धर्मवीर आनंद दिघे यांनी टेंभीनाक्यावरची हंडी मोठ्या जल्लोषात साजरी करण्याचा चंग बांधला. दिघे साहेबांनंतर विद्यमान उपमुख्यमंत्री एकनाथ शिंदे यांनी ही परंपरा कायम ठेवत या महोत्सवाला वेगळे वलय निर्माण करून दिले. टेंभी नाक्यावरच्या हंडीत बक्षिसांबरोबरच त्याच दिवशी जाहीर केलेली बक्षिसे रोख स्वरूपात देण्यात येऊ लागली.

यंदा मुंबई व ठाणे येथील गोविंदा पथकांसाठी अनुक्रमे एक लाख ५१ हजार रुपयांचे रोख पारितोषिक आणि आकर्षक चषक देण्यात येणार आहे. विशेष म्हणजे महिला गोविंदा पथकासाठीही एक लाख रुपयांचे बक्षीस जाहीर करण्यात आले आहे. तसेच यंदा गोविंदांच्या सुरक्षेसाठी रॅपलिंगसाठी दोरखंड (सेफ्टी रोप्स) वापरण्याची योजना असून, सुरक्षिततेलाही विशेष महत्त्व देण्यात आले आहे, अशी माहिती ठाणे जिल्हाप्रमुख आणि खासदार नरेश म्हस्के यांनी दिली.

परंपरेचा गौरव
टेंभी नाक्यावरील दहीहंडीची परंपरा धर्मवीर आनंद दिघे यांनी सुरू केली आणि ठाण्याच्या सांस्कृतिक व उत्सव परंपरेत एक मानाचं स्थान मिळवलं. त्यांच्या पश्चात उपमुख्यमंत्री एकनाथ शिंदे यांनी या परंपरेला नवी उंची दिली असून, ठाण्यातील या मानाच्या हंडीची ओळख राज्यभर पसरली आहे.

लोककलेचा ठसका
उत्सवामध्ये यंदा अनेक नामवंत गायक, मराठी-हिंदी चित्रपट व मालिकांतील लोकप्रिय कलाकार तसेच लावणी सम्राज्ञींच्या नृत्याविष्काराचा बहारदार जल्लोष पाहायला मिळणार आहे. आधुनिक साउंड सिस्टीम आणि नेत्रदीपक रोषणाईमुळे कार्यक्रमाची रंगत अधिकच वाढणार आहे.

ठाणे दहीहंडीचा ‘ब्रँड’
उत्साह, साहस, संगीत आणि सामाजिक संदेश यांचं अनोखं मिश्रण असलेल्या टेंभी नाका दहीहंडीचा ‘ब्रँड’ व ‘गौरव’ ठाणेकरांच्या मनात दृढ झाला आहे. गोविंदा पथकांचा थरांचा थरार आणि प्रेक्षकांचा जल्लोष पुन्हा एकदा टेंभी नाक्याच्या परिसराला निनादवून टाकणार आहे.

थरांसाठी पारितोषिक
७ थर - १०,०००
६ थर - ७,०००
५ थर - ५,०००
४ थर - ४,०००