समृद्धी महामार्गावर कारला ट्रकची धडक

समृद्धी महामार्गावर कारला ट्रकची धडक
एक ठार, सहा गंभीर जखमी
शहापूर, ता. १३ (वार्ताहर) : शहापूर तालुक्यातील मुंबई-नागपूर समृद्धी महामार्गावर मंगळवारी (ता. १२) पहाटे एका कारला भरधाव ट्रकने जोरदार धडक दिली. या अपघातात कारमधील गोदावरी गायकवाड (वय ४८, रा. हिंगोली) यांचा जागीच मृत्यू झाला, तर सुमारे सहा जण गंभीर जखमी झाले. ही घटना शहापूरजवळील कासगावजवळ घडली. मुंबईहून हिंगोलीकडे जात असलेल्या कारमधील प्रवासी महामार्गावर कासगाव येथे रस्त्याच्या कडेला थांबले होते. त्या वेळी पाठीमागून आलेल्या भरधाव ट्रकने त्यांना धडक दिली. अपघातानंतर ट्रकचालक ट्रक रस्त्यावर सोडून पसार झाला असून, त्याचा शोध शहापूर पोलिस घेत आहेत. जखमींवर तातडीने शहापूर उपजिल्हा रुग्णालयात प्राथमिक उपचार करण्यात आले. त्यानंतर काहींना पुढील उपचारासाठी इतर ठिकाणी हलविण्यात आले आहे.