लोकल पकडण्यासाठी जीवघेणे धाडस

लोकल पकडण्यासाठी जीवघेणे धाडस
वेळापत्रक कोलमडल्याने प्रवासी रुळावर उतरले
बदलापूर, ता. १३ (बातमीदार) : बदलापूर रेल्वेस्थानकावर बुधवारी सकाळी मध्य रेल्वेची सेवा कोलमडल्याने कामावर जाण्याच्या घाईत असलेल्या प्रवाशांनी अक्षरशः आपला जीव धोक्यात घालून रेल्वे रुळांवर उतरून विरुद्ध दिशेने लोकल पकडण्याचे धाडस केले. सकाळी ८ वाजून २५ मिनिटांनी सुटणारी लोकल तब्बल ९ वाजता येत असल्यामुळे प्रचंड गर्दी निर्माण झाली होती. यामुळे रेल्वे प्रशासनाच्या कामकाजावर संतप्त प्रवाशांनी रोष व्यक्त केला आहे.

सकाळी ८ नंतर कर्जतकडून मुंबईच्या दिशेने जाणाऱ्या सर्व लोकल २५ ते ३० मिनिटे उशिरा धावत होत्या. फलाट क्रमांक ३ वर इतकी गर्दी झाली की, दोन लोकलची वाट पाहणारे प्रवासी एका वेळी फलाटावर होते. कामावर उशीर होणार या भीतीने अनेक प्रवासी रुळावर उतरले व विरुद्ध दिशेने येणारी लोकल पकडण्याचा प्रयत्न केला. प्रवाशांनी सांगितले की, “कामावर पोहोचण्यासाठी ही ट्रेन पकडणे गरजेचे होते अन्यथा लेटमार्क टळणे अशक्य होते.” मात्र यामुळे प्रवाशांचा जीव धोक्यात आला होता.

फलाट क्रमांक २ वरून जर याच वेळी कर्जतच्या दिशेने एक्स्प्रेस किंवा दुसरी लोकल आली असती, तर भीषण अपघात घडला असता. रेल्वे रुळांवर प्रवाशांचे इतक्या मोठ्या प्रमाणात उतरणे हे रेल्वे सुरक्षा यंत्रणेचे अपयश दर्शवते, अशी संतप्त प्रतिक्रिया प्रवाशांकडून येत आहे.

अपघातामुळे खोळंबा?
रेल्वे प्रशासनानुसार, बदलापूर स्थानकाच्या १-१.५ किमी अंतरावर एक अनोळखी व्यक्ती जखमी व बेशुद्ध अवस्थेत रुळांवर आढळून आली. त्याला ग्रामीण रुग्णालयात नेण्यात आले, मात्र डॉक्टरांनी त्याला मृत घोषित केले.
या व्यक्तीचा मृत्यू नेमका कशामुळे झाला – लोकलची धडक की पडल्यामुळे? याबाबत अधिकृत माहिती मिळालेली नाही, मात्र याच अपघातामुळे लोकल थांबवावी लागली आणि त्यामुळे पुढच्या गाड्यांवर परिणाम झाला असल्याचे समजते.

कामावर जायचे म्हणून आम्ही ट्रेन पकडण्यासाठी रुळांवर उतरलो, पण हे रोजचे नसले तरी आठवड्यातून एकदा तरी असेच होते. वेळेवर लोकल सुटत नसतील, तर किमान माहिती तरी द्या
- सुशांत तांबे, प्रवासी