दिबांच्या नावासाठी आंदोलन

दिबांच्या नावासाठी आंदोलन
नवीन पनवेलमध्ये पालिकेच्या फलकाला काळे फासले
पनवेल, ता. १३ (बातमीदार)ः नवी मुंबई आंतरराष्ट्रीय विमानतळाच्या दिशादर्शक फलकांवर स्थानिक भूमिपुत्र दि. बा. पाटील यांच्या नावाचा उल्लेख नसल्याने प्रकल्पग्रस्तांमध्ये नाराजी आहे. अशातच नवीन पनवेल परिसरातील पालिकेने लावलेल्या नवी मुंबई आंतरराष्ट्रीय विमानतळाच्या फलकांवर दि. बा. पाटील यांचे नाव नसल्याने मनसे पदाधिकाऱ्यांनी काळे फासत आंदोलन केले.
दि. बा. पाटील यांचे विमानतळाला नाव देण्यासाठी स्थानिक भूमिपुत्रांनी अनेक वेळा मोर्चा काढून लढा दिला आहे. समाजहितासाठी, जनहितासाठी संघर्ष करून स्थानिक शेतकऱ्यांचे आणि रहिवाशांचे हित जोपासले. मात्र मागणी करूनही विमानतळाला त्यांचे नाव दिले जात नाही, ही बाब अत्यंत खेदजनक आहे. विमानतळाच्या दिशादर्शक फलकांवर थेट नवी मुंबई विमानतळ असे नाव असल्याने स्थानिकांच्या भावना दुखावल्या आहेत. त्यामुळे मनसेसह विविध स्थानिक संघटना अन्यायाविरुद्ध आवाज उठवत आहेत.
-----------------------------
पनवेल परिसरामध्ये विमानतळाचे लागलेले दिशादर्शक फलक पाहता भूमिपुत्रांच्या बलिदानाला कुठलाही सन्मान दिला गेलेला नाही. दि. बा. पाटलांनी जीवाचा आटापिटा करून जनहिताचे कार्य केले. त्यांचे नाव नवी मुंबई विमानतळाला देणे गरजेचे आहे.
- धनंजय पाटील, स्थानिक, पनवेल