हर घर हर तिरंगा अभियानाद्वारे स्वतंत्र सैनिकांच्या वारसांचा सन्मान

घरोघरी तिरंगा अभियानाद्वारे स्वतंत्र्य सैनिकांच्या वारसांचा सन्मान
पेण, ता. १३ (वार्ताहर) : केंद्र शासनाच्या आदेशानुसार २ ते १५ ऑगस्ट यादरम्यान घरोघरी तिरंगा या अभियानाद्वारे पेण नगर परिषदेच्या माध्यमातून विविध कार्यक्रम राबवण्यात येत आहेत. पेण शहरात बुधवारी (ता. १३) स्वातंत्र्य सैनिकांच्या वारसांचा आमदार रवींद्र पाटील यांच्या हस्ते सन्मान करण्यात आला.
रवींद्र पाटील म्हणाले, स्वातंत्र्य सैनिकांचा इतिहास फार मोठा आहे. त्यांच्यामुळेच आजचा दिवस आपण पाहात आहोत. त्यांच्या बलिदानाला, त्यागाला आपल्याला कधीही विसरता येणार नाही. मिठाचा, चिरनेरचा यासह विविध सत्याग्रह करून या स्वातंत्र्यसैनिकांनी आपले रक्त वाहिले म्हणून त्यांचा आदर्श आपल्या डोळ्यासमोर ठेवला पाहिजे.
या अभियानात नगरपालिकेच्या वतीने घरोघरी तिरंगा रॅली, रांगोळी स्पर्धा, शालेय विद्यार्थ्यांचे देशभक्तीवर गीत गायन, राखी बनवणे व प्रश्नमंजुषा स्पर्धा यासह विविध स्पर्धा या सप्ताहात घेण्यात आल्या. या वेळी मुख्याधिकारी जीवन पाटील, नगररचनाकार सुहास कांबळे, किरण शहा, दयानंद गावंड, रमेश देशमुख, विश्वनाथ गायकवाड, शिवाजी चव्हाण, प्रशांत ढवळे आदी नगरपालिका अधिकाऱ्यांसह कर्मचारी आणि स्वातंत्र्य सैनिकांचे नातेवाईक उपस्थित होते.