गोविंदा पथकाच्या चषकाचा अनावरण सोहळा

गोविंदा पथकाच्या चषकाचा अनावरण सोहळा
अलिबाग (वार्ताहर) ः येथील शेकाप भवनातील सभागृहात मंगळवारी (ता. १२) महिला व पुरुष गोविंदा पथकांच्या चषकाचा अनावरण सोहळा उत्साहात पार पडला. शेतकरी कामगार पक्ष, पुरोगामी युवक संघटना अलिबाग पुरस्कृत प्रशांत नाईक मित्रमंडळ आयोजित दहीहंडी उत्सव अलिबागमध्ये पाहायला मिळणार आहे.
अलिबाग शहरात दहीहंडी सोहळा शनिवारी (ता. १६) दुपारी तीन वाजल्यापासून रंगणार आहे. यानिमित्ताने शेतकरी भवन येथील सभागृहात बैठकीचे आयोजन केले. माजी नगराध्यक्ष प्रशांत नाईक यांच्या अध्यक्षतेखाली ही बैठक पार पडली. या वेळी शेकाप राज्य महिला आघाडी प्रमुख ॲड. मानसी म्हात्रे, शेकाप जिल्हा सहचिटणीस ॲड. गौतम पाटील, सतीश प्रधान, शेकाप शहर चिटणीस अनिल चोपडा, संदीप शिवलकर, नील नाईक आदी मान्यवरांसह गोविंदा पथकांचे प्रतिनिधी, मंडळाचे सदस्य व कार्यकर्ते उपस्थित होते. गोविंदा पथकाच्या सुरक्षेसाठी डॉक्टरांसह रुग्णवाहिका, वैद्यकीय पथके असणार आहेत. सर्वांना उत्सव आनंदमय व शांततामय वातावरणात पाहता यावा, यासाठी योग्य नियोजन करण्यात आले आहे. या वेळी दहीहंडी उत्सवात सहभाग घेणाऱ्या गोविंदा पथकांना अटी व शर्तींची माहिती देण्यात आली.