एनटीसी चाळींचे लवकरच म्हाडाद्वारे पुनर्वसन

एनटीसी चाळींचे लवकरच म्हाडाद्वारे पुनर्वसन
सूचना व हरकती देण्याचे आवाहन
शिवडी, ता. १४ (बातमीदार) ः गेल्या तीन पिढ्यांपासून राष्ट्रीय वस्त्रोद्योग महामंडळाच्या (एनटीसी) गिरण्यांच्या धोकादायक चाळींमध्ये राहणाऱ्या कामगार रहिवाशांच्या नशिबी आनंदाचे दिवस येणार आहेत. लवकरच म्हाडाद्वारे या इमारतींचा पुनर्विकास होणार असून, यासंदर्भात सूचना व हरकती मागवण्यात आल्‍या आहेत.
राष्ट्रीय वस्त्रोद्योग महामंडळाच्या मुंबईतील गिरण्यांच्या चाळींच्या पुनर्विकासाचा प्रश्न अनेक वर्षांपासून प्रलंबित आहे. यासंदर्भात राष्ट्रीय मिल मजूर संघाने सातत्‍यान पाठपुरावा केला होता. रहिवासी कामगारांना ४०५ चौरस फूट चटई क्षेत्रफळाचे निवास मिळणार आहे. त्यासाठी गृहनिर्माण सरकारी अधिकाऱ्यांनी संबंधित रहिवाशांकडे येत्या (ता. १८) ऑगस्टपर्यंत सूचना व हरकती मागविल्या आहेत. या पार्श्वभूमीवर‌‌ नुकतीच मजदूर मंझील येथे राष्‍ट्रीय मिल मजदूर संघ आणि एनटीसी चाळ रहिवासी कृती समितीची बैठक पार पडली.
राष्ट्रीय मिल‌ मजदूर संघाचे अध्यक्ष आमदार सचिन अहिर त्या वेळी एनटीसी चाळ रहिवाशांशी संवाद साधताना म्‍हणाले, एनटीसी गिरणी कामगारांनी पुनर्वसनाची संधी सोडता कामा नये. संघटना भाडेकरूंना कदापि एकाकी पडू देणार नाही. मीदेखील रहिवाशांच्या हितासाठी या प्रश्नावर लेखी सूचना व हरकती मांडणार आहे.
सरचिटणीस गोविंदराव मोहिते यांनी ही बैठक बोलावली होती. कृती समितीचे अध्यक्ष निवृत्ती देसाई, उपाध्यक्ष भाऊसाहेब आंग्रे, सचिव किरण गावडे यांनी रहिवासी कामगारांच्या समस्या मांडल्या. समितीमध्ये कायम एकोपा ठेवण्याचेही त्यांनी आवाहन केले आहे. याप्रसंगी नरेंद्र तारी, अभिनंदन मोरे, रवींद्र नाईक, सुरेश जिकमडे, दीपक कदम, दिलेश जोशी, दीपक राणे, राजू सरमळकर, संजय कांबळे आदींनी चर्चेत सहभागी होऊन आपले मत मांडले. संघाचे उपाध्यक्ष अण्णा शिर्सेकर, बजरंग चव्हाण, सचिव शिवाजी काळे यांनीही आपल्या सूचना मांडल्या. या चाळीचे ताबडतोब पुनर्वसन झाले पाहिजे, अशी मागणी राष्ट्रीय मिल मजदूर संघाच्या वतीने सरचिटणीस गोविंदराव मोहिते यांनी केली आहे.