रामिम संघ सार्वजनिक वाचनालयाची आदरांजली

रंगनाथन यांना रामिम संघ सार्वजनिक वाचनालयाची आदरांजली
शिवडी, ता. १२ (बातमीदार) ः भारतीय ग्रंथालय चळवळीचे प्रणेते रंगनाथन यांची जयंतीनिमित्त कार्यक्रम मंगळवारी (ता. १२) राष्ट्रीय मिल मजदूर संघ सार्वजनिक वाचनालय आणि ग्रंथालयाच्या वतीने परेल येथील वाचनालयात पार पडले. संघाचे अध्यक्ष-आमदार सचिन अहिर, सरचिटणीस आणि सार्वजनिक वाचनालयाचे अध्यक्ष गोविंदराव मोहिते यांच्या पुढाकाराने आयोजित केलेल्या या कार्यक्रमात रंगनाथन यांची ग्रंथ निर्मितीची प्रेरणा पुढे नेण्याचा संकल्प केला.
यावेळी रंगनाथन यांच्या योगदानाला उजाळा देण्यात आला. तर संघटनेचे उपाध्यक्ष बजरंग चव्हाण आणि ग्रंथपाल ममता घाडी यांनी सांगितले की, ग्रंथालय शास्त्रातील मौल्यवान योगदानाबद्दल भारत सरकारने १९५७ साली रंगनाथन ‌यांचा पद्मश्री पुरस्कार देऊन गुणगौरव केला. ही गोष्ट आजच्या ग्रंथालय चळवळीला निश्चितच प्रेरणादायी ठरावी. त्यांनी त्यांच्या व्यवसायिक जीवनाची सुरुवात गणितज्ज्ञ म्हणून केली असली तरी, ग्रंथालय ‌निर्मितीसाठी दिलेले उत्तेजन भविष्य काळाला उज्वल करणारे‌ ठरले‌ आहे. यावेळी रंगनाथन यांच्या विविध पैलूंवर प्रकाश झोत टाकण्यात आला.
दरम्यान, उपाध्यक्ष सुनील बोरकर, श्रम संशोधन संस्थेचे संचालक जी. बी. गावडे, लेखक काशिनाथ माटल, सहकारी संस्थेचे संचालक विलास डांगे, वाचनालय कमिटीचे सदस्य मारुती शिंत्रे, संघटनेचे सचिव मोहन पोळ, राजेंद्र साळसकर आदी मान्यवर त्यावेळी उपस्थित होते.