आमदाराच्या पुतण्याची लाखोंची फसवणूक

उरण, ता. १४ (वार्ताहर)ः उरणचे आमदार महेश बालदी यांच्या पुतण्याची दोन लाख ६० हजारांची फसवणूक करण्यात आली आहे. याप्रकरणी रवी मित्तल रा. आगरा, उत्तर प्रदेश यांच्यावर गुन्हा दाखल करण्यात आला आहे.
आमदार महेश बालदी यांचे मोठे भाऊ, चुलत भाऊ उरण येथे एकत्र राहतात. राजस्थान येथील पीही येथे शेती आणि फार्महाउस असून, शुभम बालदी यांनी दोन लाख ६० हजार रुपये भरून किर्लोस्कर कंपनीचे ऑनलाइन जनरेटर खरेदी केले होते, मात्र नवीन जनरेटर खरेदी केले असताना मूळगावी पीही येथे किर्लोस्कर कंपनीचे जुने जनरेटर नेऊन दिले. जनरेटरची पॅकिंग उघडून पाहिले असता ६० हजार १८० रुपयांचे बिल पाठवण्यात आले होते. याबाबत रवी मित्तलकडे चौकशी केली तेव्हा त्याने उडवाउडवीची उत्तरे दिली. त्यामुळे फसवणूक झाल्याचे लक्षात आल्यानंतर शुभम बालदी यांनी उरण पोलिस ठाण्यात गुन्हा दाखल केला आहे.