पालिकेत दुय्यम अभियंत्यांची रिक्त पदे तत्काळ भरा

पालिकेत दुय्यम अभियंत्यांची रिक्त पदे तत्काळ भरा
न्यायालयात जाण्याचा युनियनचा इशारा
सकाळ वृत्तसेवा
मुंबई, १४ ः मुंबई महापालिकेत दुय्यम अभियंता स्थापत्य अभियांत्रिकी व विद्युत विभागातील पदाची अनुक्रमे ३०७ आणि १३२ पदे तत्काळ भरावीत अन्यथा आम्हाला न्यायालयात दाद मागावी लागेल, असा इशारा देणारे पत्र बृहन्मुंबई म्युनिसिपल इंजिनिअर्स युनियनने महापालिका प्रशासनाला दिलेले आहे.
महापालिकेतील अभियांत्रिकी विभागातील अभियंत्यांच्या नियुक्ती, पदोन्नती, बदली, सेवाज्येष्ठता आदी कामकाज पालिकेच्या नगर अभियंता कार्यालयाकडून केले जाते. महापालिकेतील अभियांत्रिकीच्या संवर्गात कनिष्ठ अभियंता, दुय्यम अभियंता, सहाय्यक अभियंता, कार्यकारी अभियंता, उपप्रमुख अभियंता या पदापर्यंतच्या पदोन्नतीची कार्यवाही केली जाते.
कनिष्ठ अभियंत्यांना दुय्यम अभियंतापदी पदोन्नती देताना एकूण पदांपैकी ५० टक्के कोटा आरक्षित आहे. त्यानुत्रसार, सध्या दुय्यम अभियंता (स्थापत्य) पदाची ३०७ पदे रिक्त असून, ती पदे खात्यांतर्गत कनिष्ठ अभियंत्यांना पदोन्नतीने नियुक्त करणे आवश्यक आहे.
दुय्यम अभियंता (यांत्रिकी व विद्युत) पदाची १३२ पदे रिक्त असून, ती पदे खात्यांतर्गत कनिष्ठ अभियंत्यांना पदोन्नतीने नियुक्त करणे आवश्यक आहे, मात्र नगर अभियंता कार्यालयाने एवढ्या मोठ्या प्रमाणात दुय्यम अभियंता पदे रिक्त ठेवून कनिष्ठ अभियंत्यांवर अन्याय होत असून, एकप्रकारे पदोन्नतीचा अधिकार नाकारला असल्याचे अभियंता युनियनने म्हटले आहे.

नगर अभियंता कार्यालयाचा दिसाळ कारभार
पदोन्नतीसाठी १ सप्टेंबर २०२४ ते ३१ ऑगस्ट २०२६ हा कालावधी अहवाल वर्ष मानून त्या काळात सेवानिवृत्तीने पदोन्नतीने रिक्त होणाऱ्या पदांचा आढावा घ्‍यावा, सेवाज्येष्ठतेनुसार निवड करून अभियंत्यांची आगाऊ पदोन्नती सूची तयार करावी; जेणेकरून रिक्त होणाऱ्या पदांवर क्रमवारीनुसार अभियंत्यांना पदोन्नती मिळू शकेल, अशा संघटनेने मागण्या केल्‍या आहेत. मागण्यांकडे नगर अभियंता कार्यालयाने सतत दुर्लक्ष केलेले आहे, असे बृहन्मुंबई म्युनिसिपल इंजिनिअर्स युनियनचे सरचिटणीस यशवंत धुरी यांनी पत्रात लिहीले आहे.