सलग दुसऱ्या दिवशीही जुगार अड्ड्यावर कारवाई

सलग दुसऱ्या दिवशीही जुगार अड्ड्यावर कारवाई
दोन दिवसांत ५० जणांवर गुन्हा

अंबरनाथ, ता. १५ (वार्ताहर) ः सणासुदीच्या पार्श्वभूमीवर शहरातील कायदा-सुव्यवस्था अबाधित राखण्यासाठी तसेच सणांना गालबोट लागू नये म्हणून अंबरनाथ पोलिसांनी सलग दुसऱ्या दिवशीही जुगार अड्ड्यांवर धाड टाकली. या कारवाईत अनेक जुगारी रंगेहाथ पकडले गेले असून, गेल्या दोन दिवसांत एकूण ५०पेक्षा जास्त जुगाऱ्यांवर अंबरनाथ पोलिस ठाण्यात गुन्हे नोंदवण्यात आले आहेत.
अंबरनाथ शहरात विविध ठिकाणी बंद गाळ्यांमध्ये जुगार अड्डे सुरू असल्याची माहिती अंबरनाथ पोलिसांना मिळाली होती. या माहितीच्या आधारे वरिष्ठ पोलिस निरीक्षक शब्बीर सय्यद यांच्या मार्गदर्शनाखाली अंबरनाथ पोलिस व गुन्हे शाखेने जुगार अड्ड्यावर सतत दोन दिवस धाडसत्र सुरू आहे. दरम्यान, बुधवारी पश्चिमेकडील बुवापाडा, भास्करनगर तसेच नवीन भेंडीपाडा या तीन ठिकाणी पोलिसांनी धाड टाकली असता, एकूण ४३ जणांना जुगार खेळताना रंगेहाथ पकडले. या वेळी सुमारे ७० हजारांचा मुद्देमालदेखील हस्तगत करण्यात आला. पोलिसांनी गुरुवारी पुन्हा एकदा रेल्वेस्थानक परिसरात जुगार खेळताना नऊ जणांना रंगेहाथ पकडले. तसेच सुमारे १० हजारांचा मुद्देमाल हस्तगत करण्यात आला. शहरात बंद गाळ्यांमध्ये जुगार अड्डे सुरू असून नेहमीच कारवाई होत असते. तसेच यापुढेही कारवाई सुरू राहील, अशी माहिती पोलिसांनी दिली.