मांसविक्री बंदीविरोधात कोंबड्या घेऊन निदर्शने

मांसविक्री बंदीविरोधात कोंबड्या घेऊन निदर्शने

सकाळ वृत्तसेवा
डोंबिवली, ता. १५ ः गेल्या काही दिवसांपासून राज्यभर गाजत असलेल्या स्वातंत्र्यदिनी मांसविक्री बंदीच्या केडीएमसीच्या निर्णयाविरोधात शुक्रवारी (ता. १५) खाटिक समाज आणि काँग्रेस पक्षाकडून प्रतीकात्मक आंदोलन करण्यात आले. खाटिक समाज आणि काँग्रेस पक्षाच्या कार्यकर्त्यांनी हातामध्ये कोंबड्या घेऊन ‘लोकशाहीचे बटण दाबा, दाबून चिकन-मटण खा’ अशा घोषणा देत केडीएमसीच्या या निर्णयाचा विरोध केला.
पालिका प्रशासनाने आपला निर्णय कायम ठेवल्याने खाटीक समाजाचे पदाधिकारी आणि काँग्रेसचे जिल्हाध्यक्ष सचिन पोटे यांच्या मार्गदर्शनाखाली व्यापारी असोसिएशनचे अध्यक्ष संतोष घोणे, काँग्रेसचे सरचिटणीस नवीन सिंग, राजाभाऊ पातकर यांसह अनेक कार्यकर्त्यांनी शुक्रवारी स्वातंत्र्यदिनी केडीएमसी मुख्यालयात कोंबडी घेऊन शिरण्याचा प्रयत्न केला. या वेळी केडीएमसी निर्णयाच्या विरोधात विविध घोषणाबाजी करीत निषेध व्यक्त करण्यात आला. सुरुवातीला खाटिक समाजाचे सदस्य आणि पदाधिकाऱ्यांनी अचानक केडीएमसी मुख्यालयाबाहेर धडक देत निदर्शने केली. हातामध्ये कोंबड्या घेत त्यांनी केडीएमसीच्या या निर्णयाचा विरोध केला. या सर्व आंदोलकांना बाजारपेठ पोलिसांनी ताब्यात घेतले. त्यांच्यापाठोपाठ कल्याण जिल्हा काँग्रेसचे जिल्हाध्यक्ष सचिन पोटे यांच्या नेतृत्वाखाली छत्रपती शिवाजी महाराज चौकातून केडीएमसीकडे येणाऱ्या मार्गावर आंदोलन केले. काँग्रेस कार्यकर्त्यांनीही हातामध्ये कोंबड्या घेऊन केडीएमसीच्या निर्णयाविरोधात जोरदार घोषणाबाजी केली. हा निर्णय म्हणजे लोकशाहीची गळचेपी असून आम्ही आमच्या स्वातंत्र्यावरील येणारी बंधने अजिबात सहन करणार नाही, अशी प्रतिक्रिया या वेळी सचिन पोटे यांनी दिली. आंदोलकांना बाजारपेठ पोलिसांनी ताब्यात घेत नंतर सोडून दिले.
...
मुख्यालयाबाहेर पोलिसांचा फौजफाटा
झेंडावंदन झाल्यानंतर सकाळपासूनच केडीएमसी मुख्यालयाबाहेर पोलिसांचा मोठा फौजफाटा तैनात करण्यात आला होता. खबरदारीचा उपाय म्हणून शंकरराव चौकाकडून छत्रपती शिवाजी महाराज चौकाकडे जाणारा आणि तिकडून इकडे येणारे दोन्ही मुख्य रस्ते पोलिसांनी बॅरिकेड्स लावून बंद केले होते.