स्वातंत्र्य दिनी महामार्गावर ''रायडिंगचा'' धुमाकूळ

पोलिस विभागाकडून जनजागृतीचा उपक्रम
कासा, ता. १६ (बातमीदार) : स्वातंत्र्यदिनानिमित्त मुंबई-अहमदाबाद महामार्गावरील आंबोली येथील हॉटेल अहुरा परिसरात बाईक रायडर्सची प्रचंड गर्दी उसळली. ठाणे, मुंबई, नाशिक, विरार, पालघर अशा भागांतून तब्बल ५०० ते ८०० रायडर्स आपल्या लाखो रुपयांच्या सुपरबाईक्स घेऊन येथे जमले होते. वर्षातून स्वातंत्र्यदिनी आणि प्रजासत्ताकदिनी हा भाग रायडर्सचा हॉटस्पॉट बनतो. त्याचबरोबर रविवार तसेच इतर सुट्ट्यांच्या दिवशीदेखील अनेक रायडर्स येत असतात.
यावर्षी महामार्ग पोलिस ठाणे चारोटीचे प्रभारी अधिकारी अमोल जाधव यांनी आपल्या पथकासह स्वतः घटनास्थळी उपस्थित राहून वाहतूक जनजागृती उपक्रम राबविला. वाहतूक नियमांचे प्रात्यक्षिकासह मार्गदर्शन केले. तसेच दुचाकी चालवत असताना हेल्मेटचा अनिवार्य वापर, अचानक ओव्हरटेक टाळणे, बाईक डाव्या लेनने चालवणे, वाहनांमधील सुरक्षित अंतर, अपघातानंतर गोल्डन अवरमध्ये मदत करण्याचे महत्त्व, प्राथमिक उपचारांबाबत माहिती दिली. यासोबतच मागील काही वर्षांत याच महामार्गावर झालेल्या बाईक अपघातांतील मृत्यूंची आठवण करून देण्यात आली.

चौकट
अमोल जाधव यांचे भावनिक आवाहन
मोटारसायकल रायडिंग हा छंद सर्वांना असतो; पण अतिवेग, रेसिंग किंवा निष्काळजी स्टंटमुळे अनेक तरुणांचे आयुष्य अधांतरी झाले आहे. या पार्श्वभूमीवर जाधव म्हणाले, की छंद म्हणून बाईक चालवा, प्रवास करा; पण वेगात स्वतःच्या आयुष्याशी खेळू नका.