ठाणेकरांना वाढीव पाण्याची प्रतीक्षा

ठाणेकरांना वाढीव पाण्याची प्रतीक्षा
५० दशलक्ष लिटर मागणीपैकी मिळाले फक्त पाच दशलक्ष लिटर पाणी
सकाळ वृत्तसेवा
ठाणे, ता. १६ : शहराचा झपाट्याने होत असलेला विस्तार, नवनिर्मित मोठी गृहसंकुले आणि वाढती लोकसंख्या यामुळे पाणीटंचाईचा प्रश्न अधिकच गंभीर बनला आहे. या संकटावर उपाय म्हणून ठाणे महापालिकेने मुंबई महापालिकेकडे ५० दशलक्ष लिटर वाढीव पाण्याची मागणी केली होती; मात्र प्रत्यक्षात केवळ पाच दशलक्ष लिटरच पाणी मिळाल्यामुळे ठाणेकरांची तहान भागवणे आव्हानात्मक ठरत आहे.
ठाणे महापालिका क्षेत्राची लोकसंख्या सध्या सुमारे २७ लाख आहे. दररोज ५८५ दशलक्ष लिटर पाणीपुरवठा केला जातो. यामध्ये आता मिळालेल्या पाच दशलक्ष लिटर वाढीमुळे एकूण पाणीपुरवठा ५९० दशलक्ष लिटर झाला आहे. तथापि, मंजूर कोटा ६१६ दशलक्ष लिटर असताना प्रत्यक्षात होणारा पाणीपुरवठा अद्याप कमीच आहे. त्यामुळे घोडबंदर, कोपरी, वागळे इस्टेट, बाळकूम, इंदिरानगर, किसननगर, गावदेवी या भागांतील नागरिकांना टँकरद्वारे पाणी विकत घ्यावे लागत आहे.

घोडबंदर परिसरात मोठ्या प्रमाणावर नवी घरे आणि टॉवर्स उभे राहत असल्याने या भागातील पाणी मागणी मोठ्या प्रमाणावर वाढली आहे. पूर्वी या भागाला ११० दशलक्ष लिटर पाणी मिळत होते. आता त्यात पाच दशलक्ष लिटर वाढ झाल्याने एकूण पुरवठा ११५ दशलक्ष लिटर झाला आहे. मात्र ही वाढ अजूनही पुरेशी नाही, अशी भावना नागरिक आणि लोकप्रतिनिधींमध्ये आहे.

शहराला ५९० दशलक्ष लिटर पाणीपुरवठा
ठाणे शहरासाठी प्रतिदिन ६१६ दशलक्ष लिटर इतका पाण्याचा कोटा मंजूर आहे; मात्र प्रत्यक्षात शहराला दररोज ५८५ दशलक्ष लिटर इतका पाणीपुरवठा होतो. त्यात आता पाच दशलक्ष लिटर पाणी वाढल्याने शहराला ५९० दशलक्ष लिटर पाणीपुरवठा होत आहे. त्यामध्ये महापालिकेच्या स्वत:च्या पाणीपुरवठा योजनेतून २५० दशलक्ष लिटर, महाराष्ट्र औद्योगिक विकास महामंडळाकडून १३५ दशलक्ष लिटर, स्टेम कंपनीकडून ११५ दशलक्ष लिटर आणि बृहन्मुंबई महापालिकेकडून ९० दशलक्ष लिटर इतका पाणीपुरवठा करण्यात येतो.

शहरातील एकूण पाणीस्रोत (दैनंदिन पुरवठा)
स्रोत दशलक्ष लिटर
ठाणे महापालिकेची योजना २५०
महाराष्ट्र औद्योगिक विकास महामंडळ १३५
स्टेम कंपनी ११५
बृहन्मुंबई महापालिका ९०
एकूण ५९०

प्रभागनिहाय पाणीपुरवठा
प्रभाग समिती पाणी पुरवठा (दशलक्ष लिटर)
माजिवडा-मानपाडा १२०
कळवा ६८
मुंब्रा ६८
दिवा ६५
वर्तकनगर ६५
उथळसर ५५
वागळे इस्टेट ५३
नौपाडा ५१
लोकमान्य-सावरकरनगर ४५
एकूण ५९०