विलास ढवळे यांचा कोकण मराठी साहित्य संमेलनात सत्कार

विलास ढवळे यांचा कोकण मराठी साहित्य संमेलनात सत्कार
पद्मश्री मधु मंगेश कर्णिक यांच्या हस्ते गौरव; मराठी काव्यसंमेलनात विविध मान्यवरांची उपस्थिती
पेन, ता. १६ (बातमीदार) : मराठी साहित्य, संस्कृती आणि काव्यप्रेमींच्या उत्साहात भांडुप येथील डीएव्ही कॉलेजमध्ये नुकतेच राज्यस्तरीय मराठी काव्य संमेलन पार पडले. या संमेलनात ठाणे महापालिकेच्या आरोग्य विभागात समाजसेवा अधीक्षक म्हणून कार्यरत आणि पेणचे रहिवासी असलेल्या विलास ढवळे यांचा पद्मश्री मधु मंगेश कर्णिक यांच्या हस्ते सत्कार करण्यात आला. त्यांच्या सामाजिक बांधिलकी आणि सेवाभावी कार्याचा गौरव करण्यात आल्याने पेणवासीयांसह संपूर्ण कोकण भागात समाधान व्यक्त होत आहे.
या संमेलनाची सुरुवात विनय चौगुले यांच्या सागरा प्राण तळमळला, या गीताने झाली. कार्यक्रमाचे उद्‌घाटन ज्येष्ठ साहित्यिक पद्मश्री मधु मंगेश कर्णिक यांच्या हस्ते दीपप्रज्वलन करून झाले. मराठी भाषेच्या जपणुकीसाठी आणि कवितेच्या माध्यमातून समाजमनाला दिशा देण्यासाठी हे संमेलन एक महत्त्वपूर्ण व्यासपीठ ठरले. या प्रसंगी कविवर्य केळुसकर, कविवर्य धनंजय पाटील यांच्यासह अनेक नामवंत कवींनी उपस्थिती लावून कार्यक्रम यशस्‍वी केला. साहित्य संमेलनासाठी आयोजकांनी घेतलेल्या परिश्रमांचे कौतुक उपस्थित मान्यवरांनी केले. विविध कवींनी आपली रचना सादर करून रसिकांना भावनात्मक प्रवास घडवून आणला. या काव्यसंमेलनाने मराठी कवितेच्या परंपरेला नवी ऊर्जा दिली असून साहित्यप्रेमींसाठी ही पर्वणी ठरली.